All India Sub-Junior-ah Mama a vul

Yonex Sunrise All India Sub-Junior Badminton Tournament-ah Malsawmhlua (Mama) chuan bronze medal a hlawh chhuak a, Under-17 Boy's doubles category-ah a ṭanpui Mahendra Kalahasti, Andhra Pradesh mi nen bronze hi an vaw chhuak a ni.

P&E Veng, Serchhip rawlthar Mama hi a ṭhianpa Mahendra Kalahasti nen hian U17 huanga an inlan vawi khatna a ni a, hei vang hian Pedem, Goa-a inelna neihah hian qualifying round aṭangin inelna an hmachhawn a ṭul.

Qualifying round-ah hian mi pathum paltlangin, main draw an invawkai a, main draw-a an match hmasa berah seeded no. 3-te hmachhawn nghal mah se, harsatna awm loin straight set-in an chak - hemi hnuah khingpui pahnih paltlang lehin, semifinal hi an thleng.

Mahse, semifinal-ah hian he inelnaa rin kai ber, seeded no. 1 Bjorn Jaison leh Aathish Sreenivas P.V te ṭang dun chu hmachhawnin, hun danga an lo hneh tawh ṭhin pair lakah hian 21-13, 21-17 in an tlawm.

May 10-17 inkara neih inelnaa bronze hlawh chhuaktu Mama hian national ranking tournament-ah medal pali a lakna a ni ta der a, a hmain gold pakhat leh silver pahnih a lo vaw chhuak tawh bawk - a kum la nau mah se, a sulhnu erawh a hraw hle.

Ralte Villa BC player Mama hi Kotak Pullela Gopichand Badminton Academy, Hyderabad-ah a awm mek a, Mizoram Badminton Association (MBA) chuan thuchhuah siamin, Mizoram tihmingṭhatu Mama an chhuan thu an sawi a, duhsakna an hlan bawk.