Matip leh Thiago an chhuak dawn

Liverpool defender Joel Matip leh midfielder Thiago Alcantara te chuan season tawp rualin Merseyside club an chhuahsan dawn. Matip hian kum 2016 khan Schalke aṭangin Reds hi a zawm a, Thiago hian kum 2020 khan Bayern Munich chhuahsanin Liverpool hi a zawm thung.

Kum 32 mi Matip hian Liverpool tan match 201 khelin goal 11 a khungsak a, Premier League, FA Cup, League Cup, FA Community Shield, Champions League leh UEFA Super Cup-ah te a champion pui. Mahse, December khan a inhliam a, tun season-ah match 14 chiah khel hmanin, a inlan leh tawh lo.

Matip chuan, "Liverpool-ah kum riat zet hun duhawm tak ka hmang a, coach ropui tak leh khelhpui nuam tak takte nena club thawnthu ngaihnawm kan ziak ho thei kha ka lawm hle. Nomawi ropui tak tak chawiin, khawvela fans ṭha ber pawl kan nei," a ti.

Liverpool manager Jurgen Klopp chuan, "Football-a hun rei tak ka hman ve tawhah Matip ang tluka lawm hlawh hi ka la hre tam lo a, a chanchin a chhe lam sawi tur reng reng a awm lo," a ti thlawt!

Kum 33 mi Thiago hian beiseina sang tak nen Reds a zawm a, mahse, hliam vanga match 98 chiah khelin, goal thum a khung bakah, assist vawi ruk a nei a, FA Cup leh Community Shield chawiin, Champions League final a hruai thleng bawk.

Mahse, Thiago hian tun season-ah hliam vangin match khat chiah a khel. Spanish midfielder chuan, "He club ka chhuahsan dawna ka rilrua awm hmasa ber chu, lawmna leh hlimna a ni," a ti a, Klopp chuan, "Football i ngaina a nih chuan Thiago inkhel i en ṭhin tur a ni.

"Hliam vangin duh angin a inkhel tam thei lo a, mahse, a inlan chhunah a tiṭha em em zel - hei hi ka hriatreng tur chu a ni," a ti a, a midfielder a thlah.