Koh loh langsar Hummels

Germany coach Julian Nagelsmann-a'n Euro 2024 khel tur player 27 a hming a puang a, Champions League-a Borussia Dortmund final luhpuitu Mats Hummels leh Julian Brandt te hming a lang lo. Bayern Munich midfielder Leon Goretzka leh winger Serge Gnabry pawh a ko lo a, Gnabry erawh inhliam vang a ni thung.

Nagelsmann hian friendly match hnuhnung pahniha Netherlands leh France hnehtute chungah rinna a nghat dawn. Germany hi nomawi chawi thiam anga sawi ṭhin ni mah se tun hnaiah an che ropui lo. World Cup hnuhnung pahnihah first round a paltlang lo a, Euro 2020-ah last 16 chauh an thleng bawk.

Bayern Munich coach hlui Nagelsmann-a'n hmabak hautak zet a nei a, an ramah inelna neih a nih dawn avangin beisei a sang dawn. Kum 36 mi Nagelsmann hian rawlthar talent nei ṭha Jamal Musiala leh Florian Wirtz te chu tawnhriat nei ṭha Toni Kroos-a theihna nen a chawhpawlh fuh chuan nomawi hial chawi thei an ni ang.

Euro 2024-ah hian squad-ah player 26 awm tur a ni a, Nagelsmann hian player 27 a koh avangin pakhat paih a la ngai dawn bawk.