Zanin dar 7:30-ah Kohli Vs Dhoni

IPL league round chu tunkar tawpah khelh a ni dawn a, zanin hian knockout stage lut tur a chiang dawn. Kolkata Knight Riders, Rajasthan Royals leh Sunrisers Hyderabad ten knockout stage an lut tawh a, hmunruak pahnih hi Royal Challengers Bengaluru leh Chennai Super Kings ten an inchuh dawn.

Zanin dar 7:30 hian Bengaluru leh Chennai te hi M. Chinnaswamy Stadium, Chepauk-ah an inkhel dawn a, heta chak zawk hian knockout stage an lut ang. Inkhel pahnih hi India captain ropui pahnih Virat Kohli leh MS Dhoni te telna a nih avangin ngaihven a hlawh lehzual.

RCB hian CSK hi point hniha an phak loh bakah NRR-a an phak loh avangin chak ringawt a tawk dawn lo. CSK hian 200 runs target-ah siamsak ta se, RCB hi Chennai chunga awm tur chuan 18.1 overs-ah an chak hman a ngai ang. An bat hmasak a, 200 runs an siam chuan, RCB hian CSK hi 182 runs emaw a aia tlem an siamtir a ṭul dawn a ni.

Kumin inelnaah Kohli a che ropui hle. India captain hlui hian innings 13 aṭangin 661 runs a siam tawh a, century vawi khat leh half century vawi a nga a siam tawh. CSK lakah pawh RCB hmachhuan tur chu Kohli a ni ang.

Kohli hi kum 35 mi a ni tawh a, IPL-ah a la champion lo. Kumin hi champion-na hun ṭha a ni a, nomawi chawi tur chaun CSK hi hneh hi hna hmasa a ni. Chutihrualin Chennai erawh champion lai leh vawi nga champion tawh an ni a, hei tak hi Kohli leh Dhoni te danglamna chu a ni. Dhoni telna chu team angin an ṭha zawk zel.