Fury ngamtu Usyk a dingchang - kawnghren pali a nei ta!

Heavyweight boxing-ah Oleksandr Usyk aia ropui an awm lo - Usyk hian nimin zing khan Tyson Fury chu split decision hmangin a hneh a, heavyweight boxing-a kawnghren lian pali chu a kawl vek ta!

Kingdom Arena, Riyadh khawpuia judge pathum zinga pahnihin 115-112 leh 114-113 hmangin Usyk hi chak zawkah an puang a, judge pakhat chuan 114-113 in Fury hi a chaktir thung - a vawi khat nan Fury a tlawm a, Usyk erawhin hnehtu a la tawng lo tluang zel.

Heavyweight boxing-ah kawnghren ngaihhlut bik pali a awm a, pali zinga pathum WBA, WBO leh IBF chu chu Usyk-a kawl lai niin, Fury-a kawl WBC title a chhuhsak leh ta - four-belt undisputed heavyweight champion hmasa ber a ni.

Mahse, hei hi a tawpna tur a la ni lo - Fury leh Usyk te hian rematch neih theihna tur an contract-ah hian an ziak tel vek a, boxer pahnih hi kum tawp lamah an intawng leh dawn.

Fury a thamral

Kingdom Arena-ah Fury-a'n bul a ṭan ṭha a, mahse, a rei tawlh tawlh a, British boxer hi a talbuai - round kuanaah phei chuan a tlu hial a, bell-in a chhanhim hmante kha a lawm khawp ang. Mahse, Fury hian chak zawkah erawh a inngai tlat.

Kum 35 mi Fury chuan, "Usyk khan round ṭhenkhatah chuan hnehna a chang ngei a, mahse, a tam zawkah khan ka chakah ka inngai a ni. Usyk-te ram hian indona an hmachhawn mek a, chuvang chuan an duhsak a ni ang," a ti a, Ukraine indo avangin judge-ten Ukrainian boxer chungah zahngaihna an lantir niin a ngai tlat.

Fury chuan sawi zawmin, "Boxing khawvela thutlukna nuihzatthlak ber pawl a ni e, mahse, ka lo kir leh ang," a ti a, a kawnghren hloh tawh piahlamah Usyk-a neih sa pawh chhuhlet tura lo kir ngei a tum.

Chutihrual chuan Fury tan fimkhur a ṭul tawh ang. Amah aia sang lo leh rit lo zawk Usyk lakah a talbuai a, mi tam takin inhnek thiam bik an tih Fury hi Usyk hmaah meuh chuan a talbuai tlat - ṭha lehzuala a inbuatsaih a ṭul dawn.

Ka inpeih e

Usyk-a'n rin hlawh lo zawk ni chungin Fury a hneh a, British boxer hmachhawn tur hian a inpeih lehnghal thu a sawi - Ukrainian boxer hian chawlh hahdam lam a ngaihtuah lo a, Fury nena an inhmachhawn tur a thlir nghal.

Kum 37 mi boxer chuan, "Ka team-te chungah lawmthu ka sawi takzet. Ka tan mai ni loin ka chhungte leh ka ram tan pawh vawiin ang hi hun ṭha bik a ni a, hun hlimawm leh ni duhawm tak kan hmang a nih hi.

"Fury nen inhmachhawn lehnghal turin ka inpeih e," a ti a, British boxer hmachhawn leh tura a inpeih thu a sawi - Fury, i lo ngaithla maw? 2012 Olympics-a gold medal a hnek chhuah hnu lawka a pa chântu Usyk hian a pa chungchang a sawi lang bawk.

Usyk chuan, "Ka pa ka hmuh hnuhnun ber chu ka mumangah a ni a, ka ngai em em. A hnenah pawh, 'Kan chenna a inang ta lo a, min lo la lam rih suh' ka ti a, zaninah hian kan zingah a tel ve ngeiin ka ring a ni," a ti a, boxer rothap hian a mittui a dang zo lo.

Inpumpekna rah

Usyk hian vawi 22 inhnek hmachhawnin, hnehna a la chang vek a, undisputed cruiserweight world champion a lo ni tawh a, heavyweight-ah pawh kawnghren kawl theih zawng zawng a kawl leh ta - he boxer hi chu a ropui thlawt a ni!

Ukrainian boxer chuan, "Septem-ber 2023 khan tun fight atan hian ka inbuatsaih tawh a, thla kua zet rim takin ka bei a ni. Kum thar ka lawm ve hman lo a, ka fapate pahnih piancham ka lawmpui thei lo a, ka fanu birthday pawh ka lawmpui lo a, ka fanu a lo pianin, a kiangah ka awm thei lo bawk.

"Chawlh hahdamna hun ka nei lo a, tun fight chiah ngaihtuah hian rilru ka seng a, tunah chuan ka hlim takzet ta. Ka haw châk tawh hle," a ti a, chawlh hahdam a mamawh ve tawh thu a sawi chhuak.

Usyk-a record hi a ropui rem rem hle. Cruiserweight-a ro a rel lai pawh khan a hneh zingah boxer ropui Tony Bellew a tel a, heavyweight-ah pawh an hunlaia heavyweight boxer ṭha bik Anthony Joshua leh Fury a hneh ta.

A chhai sual

Fury-a'n fight vawi 36 a hmachhawn ta a, a vawi khat nan a tlawm - vawi 34 hnehna changin, vawi khat draw a nei tel bawk. Fury sulhnu pawh a nep lo hle. British boxer-in a hneh tawh zingah Wladimir Klitschko, Deontay Wilder, Dillian Whyte leh Derek Chisora te an tel.

Mahse, nimin zingah erawh a ngam loh val a tawng ve ta a, boxer ropui Lennox Lewis chuan Fury hian Usyk a zuam sual thu a sawi. Lewis chuan, "Fury khan hnehna chang sa ang maiin a khel a, boxer tana tih loh tawp tur a ni.

"Round a tawp rualin, chak lo zawkah inngaih zel tur," a ti a, Fury-a'n a zuam sual thu a sawi. Fury chuan, "Nuam ti takin inhnek ka hmachhawn a, kawng tinrengah fight kha ka thununin ka hria.

"Ka coach-te khan final round-ah khan, 'I tih tur va hlen rawh le' min ti se chuan, ka ti mai ang. Mahse, kan vai khan ka chak zawkah kan ngai a ni. Round hmasa parukah khan vawi khat chu a la ve mai thei - kan inhnehtawk a, ka theihtawp ka chhuah a, a tawk zo ta lo," a ti a, lo kir leh ngei a tum ang.