Tlawm miah loa champion thei Bayer Leverkusen
Bundesliga champion an ni satliah lo - German rama football inelna sang berah Bayer Leverkusen hi tlawm miah lo chunga champion thei hmasa ber an ni; Xabi Alonso leh a nauten Bayern Munich tih theih ngai loh kha an ti thei tlat!
League match khelh hmabak panga an la neih lai khan Leverkusen hi an champion chiang tawh, chumi hnuah pawh an inthlahdah chuang lo. Inrinni zan khan an match hnuhnung ber khelin, an mikhual Augsburg chu 2-1 in an hneh.
Alonso naute hian si phurh hmasak a, a hnua sut leh hram an ching. Tun ṭumah erawh Victor Boniface leh Robert Andrich ten an khung hmasa a, mikhual lamin Mert Komur hmangin sut ṭhen ve mah se an sut kim thei lo.
Record duhawm
Bundesliga-ah hian team hrang hrang an champion tawh, a bik takin Bayern Munich chuan inelna an awp hneh thei hle - nikum thleng kha chuan a zawnin season 11 hial te an champion, mahse tlawm miah loa champion tak hi chu an la nei ngai lo.
Alonso-a'n beisei phak baka ṭhain Leverkusen a kaihruai a, tun season league match 34 an khelh zinga 28 zetah chakin goal 89 an khung laiin anmahni lamah goal 24 chauh a lut thung; an tlarhma an hriamin hnung lam a phui ṭha hle.
Europe kan thlir chuan - Arsenal, Juventus leh AC Milan ten anmahni awmna ramah hneh loh nei loin league nomawi an lo chawi tawh ṭhin, club tlemte chauhin an tih theih kha an hlenchhuak a, an sulhnu hlu bik hi hriatreng a ni tawh ang.
European football-ah kum 1963-1965 khan Benfica chu tlawm loin match 49 an lo kaltluang tawh a, he record ropui tak pawh hi Leverkusen hian an rawn khum a, sulhnu ropui zawk hnutchhiah thei dinhmunah an ding mek.
German Cup leh Europa League Cup final khelh tur an la nei, an champion ve ve a nih chuan tun season inelna hrang hrangah match 53 chhung tlawm miah loin an kal dawn tihna a ni a, nomawi pathum chawi bawkin 'Invincible Treble' an ni thut thei.
Pathumna Bayern
Striker ṭha bik Harry Kane an lalut a, league mai bakah Champions League thlenga champion thei tura beisei an ni. Mahse, Kane awmna Bayern Munich tawpna chu Bundesliga pathumna a ni ta si.
Bayern hian pahnihna ni turin chak an mamawh - Hoffenheim khelmualah minute 10 a liam hmain goal hnih an khung hman, chiang taka chak tur angin lang mah se a tawpah Bavarians hi 4-2 in an tlawm ta zawk.
Thomas Tuchel hoin season an hmang ṭha lo, league nomawi an chawi loh bakah German Cup an la thei bawk si lo, season thar khuhhawn nan German Super Cup an khel phak dawn lo - Kane tan nomawi chawi tur a awm hnaivai mai rih lo tihna a ni.
League match hnuhnung ber an khelh hmain Tuchel-a'n Bayern Munich a chhuahsan tur thu a ti chiang. February thla khan Tuchel hi a chhuak dawn tih thawm a awm tawh, mahse fans hmalakna vangin club nen an inbel leh, a tawpah erawh an inrem thei ta chuang lo.
Bayern Munich hian manager thar tur an la puang lo, an ropuina lukhum chhuhsaktu an awm tak bawk avangin manager thar tan hna a hautak dawn. Season tharah eng ang takin nge an lo kir ang tih hriat a châkawm ta hle.
