A tawpah Virat Kohli a nui ta zawk

Indian Premier League-ah hian inkhel hmuhnawm bik a awm fo tawh a, chung zingah chuan Inrinni zana Royal Challengers Bengaluru leh Chennai Super Kings inkhel hi a tel ang. Virat Kohli telna RCB-in MS Dhoni telna CSK 27 runs-in an hneh a, IPL17 knockout stage khel turin an tling.

M. Chinnaswamy Stadium, Bengaluru-a thil thlen dan hi thawnthu thiam takin a duh dan ang thlapa a ziah ang mai a ni a, a dak ṭha hle. RCB leh CSK ṭantute an in lawm chhawk a, a tawpah IPL-a la champion ngai lo Bengaluru an chak ta zawk.

Thawnthu ngaihnawm

Cricket inelnaa sum tamna ber IPL hi season 16 khelh a ni tawh a, Virat Kohli telna RCB hi an la champion ngai lo. Tun season-ah Bengaluru bul an ṭan fuh lo a, match hmasa pariatah vawi khat chiah chakin vawi sarih ngawt an chak lo.

Table mawngphah luahlumtu an ni a, chutihrualin an vanduai tel ve bawk. April 21, Thawhlehnia Kolkata Knight Riders an hmachhawn ṭumin run khat chauhin an chak lo. RCB hian tha thlahin an hun a inher chhuak dawn loah ngai se, table mawngphah hi an chhuahsan theih a rinawm loh.

Mahse, RCB hi an beidawng lo. Nomawi nena inhal tlata ngaih Kohli-a tlawm ve duh lo a, khelmualah a thiam thil pholangin run a siam tam ṭhin hle.

Bengaluru hian Sunrisers Hyderabad, Gujarat Titans (vawi hnih), Punjab Kings leh Delhi Capitals te an hneh chho a, match tawp ber khelh hmain beiseina tlem an nei.

Mipui ngaihven chu

Cricket ngaihventute chuan Inrinni zana Royal Challengers Bengaluru leh Chennai Super Kings hi an ngaihven a, final ai pawhin an ngaihven hial a tih theih ang. A chhan chu mi bik Virat Kohli leh MS Dhoni telna a ni tlat.

CSK tan chak a tawk a, an chak loh pawhin knockout stage luh theih dan a awm. RCB erawh chiang takin an chak a ngai a, ruah a sur a nih ngat phei chuan beisei tur an nei dawn lo. Khaw awm dan thlengin mipuiin an ngaihven a, India chhim lam chu ruahsur thei dinhmunah a ding.

Mipuiin an ngaihven bawk a, M. Chinnaswamy Stadium, Bengaluru a khat ṭhap. TV leh mobile aṭanga entu an tam zawk. IPL inkhel hi Jio Cinema aṭangin a en theih a, mi maktaduai 22 (2.2 crore) in an thlir. Jio Cinema-a entu tam ber record an siam hial.

Ennawm hmuhnawm chu

CSK-in vawm hmasak an thlang a, RCB tan tun inelnaa run vaw chhuak tam ber Virat Kohli leh Faf du Plessis ten bul an ṭan. M. Chinnaswamy Stadium-a entu mipuite lawmna siamin bul an rawn ṭan ṭha hle. Over thum lekah 31 runs an siam a, wicket an hloh lo.

Mahse, ruahsur vangin inkhel a khaihhlak. RCB hi bul an ṭan ṭhat avangin chak bakah knockout stage thleng turin an dinhmun a ṭha ta mah a, ruahin an beiseina a titawp thei thung.

Ruah a bang a, inkhel an ṭan leh hnuah Kohli leh Du Plessis te an fimkhur ta deuh. Kohli-a'n ball 29-ah 47 runs a siam a, a strike rate pawh 162.07 ni pha mah se tun ṭuma tan chuan duh thu a sam lo. Du Plessis pawhin 54 runs a siam a, a strike rate 138.46 a ṭha tawk lo.

Mahse, RCB tana rawn lut Rajat Patidar (41), Cameron Green (38*), Dinesh Karthik (14) leh Glenn Maxwell (16) ten run an mamawh tam tih an hria a, risk an rawn la nghal zel. Green leh Karthik strike rate-in 200 a pel ve ve a, Maxwell phei chu 320 a ni hial. RCB-in 218/5 runs an siam a, anmahni ṭantute an hlim.

Bul ṭanṭha tawk lo

CSK captain Ruturaj Gaikwad-a'n ball khat chauh hmachhawnin pavillion-ah a kir a, Daryl Mitchell pawhin run li chauh a siam. Rachin Ravindra (61) leh Ajinkya Rahane (33) te inkawpin CSK tan beiseina tlem an rawn siam.

Ravindra ball vuak, awlsam taka man theih tur chu Mohammed Siraj-a'n a thlauh - vanduaina hmahruaiah ngaih theih a ni hial. Mahse, Ravindra hian nunna pahnih a neih chu hmang ṭangkai loin Shivam Dube nena an bat laiin a run out.

Dube lahin ṭum dang a pha lo a, ball 15 a hmachhawnah run sarih chauh a siam. Risk a la ṭan dawn a, Dube ball vuak chu Green-a'n boundary bulah a mansak a, Chennai tan chak beiseina a awm tawh lo.

Mahse, chak a pawimawh ber tawh lo. IPL knockout stage luhna tura an mamawh zat 201 runs an siam theih chuan CSK tan hlawhtlinna a la ni pha tho. Ravindra Jadeja a rawn lut a, Chennai dinhmun a ziaawm hret. A kawppui Mitchell Santner erawh a ball vuak ṭha zeta lang chu mawi zetin Du Plessis-a'n a mansak.

Dhoni a rawn lut

RCB lawm viau mah se Dhoni a rawn lut a, boruak a dang ta daih. Jadeja a inringtawk chho a, Dhoni-a'n a thlawp ṭha bawk. Over hnih la awmin CSK-in 166/6 runs an siam tawh a, knockout stage lut turin 35 runs an mamawh. RCB-in New Zealand bowler Lockie Ferguson an rawn theh chhuak a, Dhoni leh Jadeja te 19 runs ngawt an vuaksak.

Over tawp berah 17 runs siam a ngai a, dinhmun ṭha zawk a hriat tawh loh. RCB tana rawn vawmtu chu India tan pawha la khel lo Yash Dayal a ni a, Dhoni-a'n six runs a vaw nghal a, stadium chungah ball a kal hial!

CSK-in ball ngaah 11 runs an siam a, RCB ṭantute aiin Chennai ṭantute an lawm tawh zawk. Mahse, Dhoni-a'n six vuak nawn a tum leh a, boundary bula ding Swapnil Singh-a'n a mansak. RCB an lawm leh tawh zawk.

Chennai lamin Shardul Thakur an luhtir a, ball hmasa ber a hlap ṭhelh nghal. Ball hnihnaah run khat siamin Jadeja-a'n a bat thei chiah. Jadeja-a'n ball hnihah 10 runs siam a ngai a, six leh four runs siam a mamawh. Mahse, Jadeja meuh pawh a che thei ta bik lo - na taka hlap a tumna lamah ṭum hnih a vuak ṭhelh.

CSK-in over 20-ah 191/7 runs an siam a, 27 runs in an chak lo. An chak lohna ai maha an ui zawk tur chu knockout stage lut tura an mamawh 10 runs an vaw chhuak thei lo hi a ni ang.

Engtin zel?

Royal Challengers Bengaluru-in hnehna hlu tak an chan avangin palina an ni dawn tih a chiang a, eliminator round an khel dawn. IPL 17-ah Kolkata Knight Riders, Rajasthan Royals, Sunrisers Hyderabad leh Bengaluru ten knockout stage an lut.

Bengaluru hian palina dinhmun an hauh a, eliminator round-a an hmachhawn tur chu nizana inkhel result-in a hril ang. Kohli hote hian May 22, Nilaini zanah Rajasthan emaw Hyderabad emaw an hmachhawn ang.

Pakhatna KKR-in qualifier 1 an khel dawn thung a, May 21, Thawhlehni zanah final khel tur hi an zawng ang. Qualifier 1-a chak zawk hian final an lut nghal a, a chak lo zawk hian eliminator-a chak zawk an hmachhawn thung dawn a ni.