Vawiin tlai dar 3:30-ah semifinal Delhi Vs Mizoram

Swami Vivekananda U-20 Men's National Football Championship-ah Mizoramin semifinal lut turin Assam 5-1 in an sawp a, vawiin tlai dar 3:30 hian Delhi nen semifinal an khel dawn. Indian football youtube channel-ah Mizo rawlthar inkhel thiamte che tla hi a en theih ang.

Inelna hi Ramakrishna Mission Ashrama Ground, Chhattisgarh-ah neih a ni a, semifinal hmasa zawkah Manipur leh Karnataka te tukin zing dar 7:30 hian an khel bawk dawn. Final hi May 22, Nilainia khelh tur a ni.

A ṭha pali chu

India ram pum huap kum 20 hnuai lam inelna hi phase liah ṭhen a ni a, group E leh group C te chuan April 12, Zirtawpni khan an khel ṭan daih tawh. Group C-ah Karnataka chu pakhatna an ni a, quarterfinal-ah group E aṭanga pakhatna West Bengal chu Saikhom Borish Singh goal hmangin 1-0 in an hneh.

April 21, Pathianniah phase 2 ṭan leh a ni a, group A-ah Manipur chu pakhatna an ni a, group H-ah Telangana chu pakhatna an ni thung. Manipur hian quarterfinal-ah Telangana hi 4-1 in an sawp. Semifinal-ah Manipur leh Karnataka te an inkhel dawn a, Manipur hi an khelh tawhna thlirin buk rit zawk an ni.

Phase 3 hi May 2, Ningani aṭangin an khel ṭan a, group B aṭangin Delhi chu pakhatna niin group D aṭangin Kerala an tling ve bawk. May 9, Ningani khan quarterfinal khelh a ni a, hun pangngaiah 3-3 a an inhnehtawk hnuin penalty shootout-ah Delhi hi 4-1 in an vannei ta zawk.

Mizoram hian phase 4-a team ṭha ber an ni a, May 11, Inrinni aṭangin phase 4 hi khelh ṭan a ni. Assam hi group G-ah Tripura, Arunachal Pradesh leh Madhya Pradesh te nen awm hoin pakhatna a ni. Mizoram hian an khingpui Meghalaya, Maharashtra leh Rajasthan te an hneh vek.

May 18, Inrinni zing khan quarterfinal hi khelh a ni a, Mizoramin Assam hi 5-1 in an sawp. Mizoram tan Lalremtluanga'n (Mamatea) goal hnih a khung a; Emanuel Lalhruaizela (Ema), Lalrothlanga leh Lalthankima ten goal khat ṭheuh an khung bawk. Assam hian defensive game khel lo se goal tam zawk an khung ngei ang.

Mizoram an ṭha

Mizoram hian tun inelnaah match li an khel tawh a, an tum tawk an la hmu lo a ni ber. HC Zarzoliana hote hian chiang takin group stage an patlang a, quarterfinal-ah pawh harsatna an la tawk lo - Assam 5-1 in an sawp.

Tun ṭum Mizoram team ṭhatna chu midfielder an nei ṭha a; Ngaihtea, Mamatea leh Ema te an hmuhnawm ṭhin hle. Kum lamah la naupang mah se MPL team tan pawh chan an har tawh hial zawk ang. Winger pahnih captain Thathana leh Sawma Tlangte te hian mual sir aṭangin team an uap lum pha a, an goal bawh a na takzet.

Tlarhma lama awm Rothlanga'n goal a keng tel a, Mizoram goal bawh a na. Tlarhnung lamah pawh Mizoram an rintlak viau. Mahse, Assam nen inkhelh ṭumin defender Laldawngzuala a inhliam. Champhai rawlthar Dawnga hi semifinal-ah a inlan theih a rinawm lo a, hei vang hian right back Freddy Lalruatkima chu Kawnpui defender C. Zomuanpuia thlawp tura a lai lama an sawn a rinawm.

Right back-ah Gilbert Lalbiaksanga a awm thei ang a, left back-ah Kanan rawlthar C. Lalmuanzuala a awm thei ang. Goalkeeper H. Lalrinzuala a dam ṭha tawh a, chutihrualin MPL10-a Chawnpui FC keeper Lalhruaitluanga'n goal a veng chhunzawm ang.

Zara a inringtawk

Mizoram coach HC Zarzoliana chuan, "Player inhliam nei mah ila, kan fixture hi a ṭha ber. Semifinal khel tur dangte chu an chawl vang vang hnuah an inkhel dawn. Keini erawh inkhel tluang lai kan ni a, inkhel turin kan inpeih. Keini chuan semifinal angin kan thlir hran lo a, ṭum danga kan khelh tur ang thoin rilru hahdam takin kan awm," tiin Vanglaini a hrilh.

Mizoram hi Zara bakah manager C. Lalramdinsanga (Hnahthial) leh assistant coach Laldampuia (Kawrtethawveng) ten an ho a, champion nomawi hawn tumin an thawkrim hle. Semifinal-ah Mizoram hian Delhi an hneh theih chuan final-ah Mizoram leh Manipur inhmachhawn theih dan a awm a, hei hi 'Dream Final' tia sawi theih an ni ang.