Dan rual lohin Hunthar an kal

Ather Pro Volleyball League 2024 khelh laiah Hunthar chuan an hmaa ding apiang an hneh zel - Inrinni zan khan Hunthar hian Tuichangral chu 25-23, 25-13, 25-22 (3-0) in an hneh.

LPS Arena, Falkland-ah Hunthar tan buaina tur lian tham a awm lo - anmahni elphak tura ngaih Tuichangral lakah pawh an buai lo, league match vawi li an khelh tawh chinah an chak vek a ni satliah lo, set hloh miah loin an khingpui an la hneh vek.

Hunthar hian an league match hnuhnung ber atan May 21, Thawhlehni zan hian Durtlang North an hmachhawn dawn, semifinal khel tura an dinhmun a chian tawh avangin player ṭha ṭhenkhat an hahchawlhtir a nih pawhin a mak lo ang.

Vawi hnih champion tawh Hunthar hi hun pawimawh laiah an hriam. Anurag Rawat-a'n point 24 hmuin tum nga a tisual a, Fabian Lallunghnema'n point hnih paihin vawi 12 a vaw tla. Setter Remsangzuala'n fing takin ball a sem a, point hnih thawk chhuak bawkin a tum khat nan Kuriz Player of the Match-a thlan a ni.

Tuichangral tan Zomuan-sanga'n ṭum 12 hlap tlain point sarih a hloh a, Sonu-a chuan point kua hlawhin point li a paih a, an khelh hnuhnun vawi hniha che ṭha Lalbiakmuana'n a club hlui lakah harsatna tawkin point sarih a hloh laiin vawi li chiah a vaw tla.

Zirtawpni zan khan champion lai Thutak Nunpuitu Team an inlan. TNT hian an league match hnuhnung berah anmahni ang bawka Mizo hlanga khel Hlimen chu 21-25, 25-14, 25-14, 25-16 (3-1) in an hneh a, semifinal an lut chiang ta bawk.

TNT inkhel hi a hmunah an hotupa Dr Sangthankima chuan a en, kum thum hnuah a hmuna PVL a en lehna hmasa ber a ni hial - a tir lamah a naute che fuh lo deuh mah se, set hnihna aṭangin Vanlalṭanchhana leh Sadrak Fanai te inlarin an team an chak pui.

Inkhairual takin TNT an inlan a, Valbuanga'n ṭum 19 vaw tlain point kua a paih a, a vawi khat nan Kuriz Player of the Match lawmman a dawng. Sadrak Fanai chuan ṭum khat chiah tisualin point 11 a hlawh a, K. Zodingliana, Zosangzuala (Lalmama) leh Vanlalchhantluanga Sailo chuan point kua ṭheuh an hmu.

Team paruk inel zinga Mizo hlang ve ve an intawng a, a vawi khat nan chak thei turin Hlimenin bul an ṭan ṭha a; Valbuanga vuak an dansak hnuah PC Lalnuntluanga'n a hlap tla a, Zodinga vuak dang lehin 21-14-in hma an hruai.

Veikhawr Rozuala Hnamte chuan Hlimenin 24-21-a an san zawk laiin set an lak theih nan a vaw tla a, an inkhelh chhungin point 12 a hmuh chanve hlohin team tana thawh hlawk ber a ni.

TNT-in a nawmsamloh avangin Laldinchhunga an hmang thei lo a, set an hloh hnuah insiam remin insawrbing leh zualin an kir leh. Set hnihna tir aṭangin thil awm dan an tidanglam a, Rozuala vuak an dansak hnuah Valbuanga'n a hlap tla a, 10-1-in hma an hruai.

Awlsam taka set an lak hnuah nuam ti takin an khel zui a, set thumnaah Sadraka leh Chhantluanga'n hlap tla zawnin 24-11-in TNT an sang a, Hlimenin point thum hmuh belh mah se set hmasa ang bawkin 14-ah an tawp.

Set linaah Valbuanga'n vaw tla zawnin 13-5-in TNT an sang. A hnuah Sadraka'n hlap tlain Lalmama'n a hui tla bawk a, Hlimen spiker-ten chhang let thei loin Nuntluanga leh Rozuala'n an vaw kai lo ve ve a, 23-16 a nih hnuah Lalmama'n point a hmu zawn a ni.