Saints vs Leeds - Tu zawk nge kir dawn?

Zirtawpni zan Championship playoff semifinal second leg-ah Southampton chuan 3-1 in West Bromwich Albion an hneh a, Championship playoff final khel turin an inpetkai.

Championship playoff semifinal hi double leg-a khelh a ni a, first leg-ah team pahnih hi 0-0 in an inhnehtawk. St. Mary's-a an intawn meuh chuan mualneitu Southampton-in mikhual lakah ṭhat an chhuah lo a, goal thum an lo khung.

Team pahnih hian first half-ah goal an khung lo ve ve. Mahse, second half ṭan aṭanga minute lina lekah William Smallbone chuan goal hmahruai a khung a, minute 78-naah Adam Armstrong chuan a belhchhah.

Baggies an talbuai zui a, hun tawp nan minute li chiah a awm tawh tihah Adam Armstrong chuan penalty hmanga khung belhin, 3-0 a ni a, hun pek belhah Cedric Kipre chuan Baggies tan khung ve leh mah se, awmzia a nei phak lo.

May 26, Pathianni zan dar 7:30-ah Championship playoff final khelh a ni dawn a, Saints hian Leeds United an hmachhawn ang - Leeds hian semifinal lehlamah, Ningani zan khan Norwich City chu 4-0 in an sawp.

Leeds leh Norwich pawh hi first leg-ah 0-0 thoin an inhnehtawk a, Elland Road-ah second leg khelh niin, Ilia Gruev, Joël Piroe, Georginio Rutter leh Crysencio Summerville ten goal khat ṭheuh Leeds tan an khung a, final an lut.

Norwich City hian an chak loh hnuin coach David Wagner an ban zui a, an ban hian an chak loh aṭangin darkar 24 pawh a liam hman lo - chak loh an tuar thiam lo hle!

Championship aṭang hian Leicester City leh Ipswich Town chu automatic-in, Premier League khel turin an inpetkai tawh a, Leeds leh Saints-a chak zawkin an zui ve leh ang.

Season hmasa khan Premier League aṭangin Foxes, Leeds leh Saints hi an tla a, club pahnih chu English top flight league-ah an kir lehnghal dawn tihna a ni.