Arteta-a'n Gunners a hre reng dawn

In hre ngai lo kan in-tawng a, inhre reng tur-in kan in kalsan leh si ṭhin. Arsenal captain Mikel Arteta chuan Emi-rates Stadium-a a match hnuhnung ber a khelh zawh hnuin engtikah mah Gunners a theihnghilh ngai tawh loh tur thu a sawi.

Pathianni zan Pre-mier League inkhela Arsenal-in an mikhual Aston Villa 4-0 a an sawp ṭumin minute 88-ah Arteta chu Mesut Ozil thlakin khelmualah a rawn tlan lut a, Spanish midfielder hian hun tawp hma chiahin Villa goal bar pet perin goalkeeper Mark Bunn-a'n an mahni lamah a tih luh phah. Arteta hian Gunners player a nih laia a hun tawp chu goal hmangin a khar a tih theih ang.

Kum 34-a upa Arteta hian 2011 khan Everton chhuahsanin Arsenal hi a zawm a, inelna hrang hrangah match 150 khelin goal 17 a khung. Player fing leh naupang zawkte ho khawm thiam a nihna chu Arsene Wenger-a'n a hmuh hmaih hauh lo.

England-a khelmual hming thang ber Wembley Stadium-ah kum 2014 May 17-a Arsenal-in FA Cup final-a Hull City 3-2 a an hneh ṭumin a vawi khat nan captain dinhmun a luah hial. 2014 August thla a lo her chhuah meuh chuan Wenger-a'n a captain puitling atan a puang zui a, a kaihhruaina hnuaiah 2014 FA Community Shield-ah khan Manchester City 3-0 a hnehin a season lehah FA Cup an humhim zui a, 2015 FA Community Shield-ah Chelsea 1-0 in an hneh zui bawk.

A club lakah lawmthu sawiin Arteta chuan, "Professional footballer ka nih laia ka match hnuhnung ber chu ka khel ta a, kawng dang zawh leh tura hmalak chu a harsa rih hle ang. He club-ah hian kum nga chhung hlim leh nuamti takin ka awm a, kei leh ka chhungte chunga an thiltih avangin lawmthu ka sawi a, Villa kan hneh ṭuma fan-te min thlah dan khan ka lawmna ti zual hle bawk," tiin lungchhe takin a sawi.

Arsenal captain hi khelmual chhung-ah a inkhel kan hmu zui tawh dawn lo pawh a ni thei a, mahse football khaw-vel erawh a chawlhsan vek lo tawp ang. Tunah hian khawthlang thuthar thehdarhtu tam tak chuan Arsenal, Manchester City leh Tottenham Hotspur te chuan team enkawl lam hna thawk turin an hual ru tawh niin an tarlang.

A hmalam hun sawi lang telin Arteta chuan hna thawh tur a hmuh thu leh a tan kawngka a inhawn reng thu a sawi a, club hming erawh a sawi lang lo thung. Season thar aṭanga Man City manager tur Pep Guardiola chuan Arteta hi thawhpui atan a duh niin kar hmasa lam khan an lo sawi tawh bawk.