Rosicky tan mangṭha tih a ṭul

Spanish La Liga, Serie A, French Ligue 1 leh Bundesliga te ai pawha tharum hman nasat a ngaihna hmun nia an sawi ṭhin Premier League khel tura Arsene Wenger-a'n kum 2006 a Borussia Dortmund aṭanga tharum ngah lo attacking midfielder Tomas Rosicky a la lut kha mi tam takin mak an ti kha a mak lo hran lo.

Amaherawhchu, Czech Republic captain hian tharum ngah lo mah se khelmual chhungah a thluak ṭha tak leh a ball thiamna hmanga Wenger lung a tih awi miau avangin hliam nei ngun hle mah se Gunners tan inelna hrang hrangah match 246 a khel hman.

Kum 35-a upa Rosicky-a'n North London club tana a contract neih lai hi season tawp rual hian a tawp zui ve nghal a, contract thar a ziah tawh loh avangin season tharah chuan a hmel kan hmu chhunzawm tawh dawn lo.

Player ṭha tak ni mah se Rosicky hi hliam vangin a buai fo a, 2008 khan a khup ti nain hei vang hian thla 14 zet a chawlh a ngai a, a hnuah a ke na vang bawkin thla nga a chawl zui leh bawk. Tun season-ah pawh khup na vang bawka buai zuiin Premier League match hnuhnung ber an khelh zan pawh khan a hliam vang hian a la inkhel thei lo. Mahse, fan-te chuan an senior player kal chhuak tur thlah nan hian amah an chawimawi nan ding chungin chibai an buk.

Thla thara khelh tur Euro-ah Rosicky hian Czech Republic a ho thei tura ngaih a ni a, hemi zawh lamah hian a hma lam hun a ti chiang tura ngaih a ni. Tun dinhmunah MLS leh United Arab Emirates lam aṭangin sawmna a dawng ni a sawi a ni a, senior career a bul ṭanna Sparta Prague lamah a kir leh zawk maithei bawk.

Borussia Dortmund midfiel-der Marco Reus chuan Rosicky hi khawvela player ṭha berte zinga mi a nih thu leh a naupan deuh lai aṭanga a inkhel a en ngun thu te, khelmual chhunga a che vel chu a entawn nasat thu a sawi. Hetihlai hian Arsenal manager Wenger chuan a player kal chhuak tur chu entawn tlak a nih thu leh theihna sang tak nei a nih thu a sawi bakah a kal leh zelna turah duhsakna a hlan bawk.