Croatia squad-ah Lovren a tel lo

Liverpool centre-back Dejan Lovren chu Euro 2016 khel tur player 27 awmna Croatia squad-ah telh a ni lo.

Southampton defender hlui telh a nih loh chhan hi coach Ante Cacic nen an inhmuh thiam loh vang a ni. Kum 26-a upa defender hi March thlaa Hungary nen friendly match an khelh ṭumin bench-ah a ṭhu tluan a, a luh loh chhan hi warming up a tih ṭhat duh tawk loh vang niin coach chuan a sawi.

Qualifier match hnuhnung pahnih aṭanga Croatia enkawltu coach Cacic chuan, "Lovren atan hian kawng ka la khar lo. Team tana khelh a pawimawh zia a hriatchhuah hunah a rawn kir leh thei ang. Eng ang pawhin che ṭha se a khelhpuite, coach leh staff-te a en hniam thei lo," tiin Lovren a chungchang a sawi.

Croatia boss Cacic chuan, "Ram tana khel tur chuan chet ṭhat a ngai a, ram leh club tana mi inpe nih a ngaih bakah dressing room boruak tichhe lo tur player a ngai a ni," tiin a player thlan dan a sawi.

Croatia hi Group D-ah Czech Republic, Spain leh Turkey te nen an awm a. Euro 2016 khel tur zingah hian Real Madrid midfielder Luka Modric leh Mateo Kovacic bakah Barcelona midfielder Ivan Rakitic leh Juventus striker Mario Mandzukic te an awm.

May 31 thleng Cacic hian final squad player 23 awmna thehluhna hun a nei ang.