Kohli leh ABD an ropui zual zel

Thawhṭanni zan Indian Premier League inkhelah hmuhnawm khawpin Virat Kohli leh AB de Villiers-te an khel a, Kolkata Knight Riders lakah Royal Challengers Bangalore chu ropui takin hnehna an chanpui.

Eden Gardens, Kolkata-a in-khel-ah mualneitu team an bat hma-sa zawk a, over 20 lekah run 183 siama mi panga hlohin KKR tan Gautam Gambhir (51 runs) leh Manish Pandey (50 runs)-te an khel ṭha a, an khingpui tan target an chhawp chhe hran lo.

Mahse, target tam tham tak nia lang hi RCB-in over 18.4 lekah umphain mi pakhat chiah an hloh a, KKR player-ten Virat Kohli leh AB de Villiers an dang zo lo.

Virat Kohli hian ball 51 lek a hmachhawnah run 75 siamin a tawp thleng a dam a, Indian batsman zinga IPL season khata run 700 vaw tling thei hmasa ber a ni nghal bawk.

AB de Villiers chuan ball 31 a hmachhawnah run 59 siamin a tawp thleng a dam a, South African batsman hian Kohli a pui ṭha takzet.

RCB batsman zinga out awmchhun Chris Gayle pawh a khel chhe hran lo. West Indies batsman hian ball 31 a hmachhawnah run 49 a vaw chhuak ve bawk a ni.

Zanin dar 8:00-ah inkhel pa-khat chiah a awm dawn a, Royal Challengers Bangalore hian chak hmel hmu hleithei lo Kings XI Punjab an hmachhawn ang.