Championship final khel tur Sheffield

Thawhṭanni zan khan Cham^-pion-ship playoff semifinal second leg khelh a ni a, Brighton & Hove Albion leh Sheffield Wednesday te 1-1 in an inhnehtawk. Sheffield Wednesday hian first leg-ah 2-0 a hnehna an lo chan tawh avangin inkhel pahnih belhkhawmah 3-1 a hnehna changin Championship playoff final khel turin an inpet tling.

Falmer Stadium-a inkhelah Brighton tan minute 19-naa Lewis Dunk goal khung chu Sheffield Wednesday tan first leg-a goal khat lo khung tawhtu Ross Wallace chuan minute 28-naah a sut a, goal dang a lut tawh lo.

Championship club 24 zinga a sang pahnih Burnley leh Middlesbrough te chu season thara Premier League khel turin an tling nghal a, league table-a pathumna aṭanga parukna te chuan playoff hmangin hmunruak dang pakhat an inchuh ṭhin.

Sheffield Wednesday boss Carlos Carvalhal chuan, "Brighton khan huntawp thlengin an theihna zawng zawng an hman avang khan fak an phu. Mahse, hei hian kan khel chhia tihna a kawk lo a, kan thawhhona a ṭhat avangin final khel tura inpet tlin hi kan phu ve bawk," tiin a sawi.

Semifinal lehlamah Hull City chuan Derby County lakah 3-0 in hnehna an chang tawh a, nizan khan second leg khelh niin result kan hre hman lo. Hnehna changtu zawk leh Sheffield Wednesday te chuan May 28 khian Championship Final an khel ang.