Europa League nomawi: Spain ah nge England ah? Liverpool leh Sevilla-in champion an inchuh dawn

Zanin dar 12:15-ah Basel khaw-puiah Liverpool leh Sevilla te an inhmachhawn dawn a, team pahnih inhmachhawnna hmasa bera chak zawk zawk hian Europa League nomawi an chawi ang.

Sevilla tan season thum chhung a zawna Europa League final an luhna a nih laiin Liverpool tan kum 2007 Champions League final an luh hnua Europe-a final an luhna hmasa ber a ni thung.

Team pahnihin an league ve veah beisei phak loin season an khar a, Champions League khelh an beiseina awmchhun chu Europa League a ni - Europa League-a champion zawk zawkin season tharah Champions League an khel ang.

The Klopp Revival

Liverpool-in nikum October thlaa Brendan Rodgers an ban hnuah manager thar Jurgen Klopp an la lut a, German coach hian Anfield-ah a thla riatna a hmang
ṭan chauh tihin Cup final pahnihah Reds a hruai thleng ta der.

Mahse, Borussia Dortmund mana-ger hlui hian League Cup final-ah Manchester City a ngam lo a, season khata Cup final pahniha tlawm chu Ger-man manager 'nung' tak hian a duh lo ang.

Liverpool-in final an luhna kawng-ah an hmelma kumhlun Manchester United hnawt chhuakin Dortmund lakah inlehthalna ropui lantir mah se Sevilla lakah hian awlsam taka chak theih a ni dawn lo.

Europa League-a champion ngun ber (4) Sevilla hian Europe-a club inelna sang ber dawttu hi an ngam hle a, kumin hi season thum chhunga final an luh vawi thumna a ni der tawh - zaninah an chak a nih chuan a zawna vawi thum champion thei hmasa ber an ni dawn tihna a ni a, Europa League history ziah danglamin a awm ang.

Champions League-a vawi nga champion tawh Liverpool-in Europa League-ah pawh sulhnu an nei chhe chuang lo, UEFA Cup tih a nih laiin vawi thum an champion tawh a, Europe-a final an luh vawi 11-ah vawi riat an champion tawh!

Tute nge khel dawn?

Liverpool tan rei tak hliam vanga an chawlh hnuah captain Jordan Henderson leh Danny Ings te an dam leh tawh a, West Brom an hmachhawn ṭuma lo kir player pahnih hian inkhel bul an ṭan beisei ni lo mah se Klopp-a tan chuan chanchin lawmawm a ni.

Mamadou Sakho chu hrem vangin tlarhnungah a la inlan thei dawn lo a, tlarhma lamah Divock Origi-a'n ngai la awh lo mah se Phillipe Coutinho, Roberto Firmino, Adam Lallana leh Daniel Sturridge-te awmna club hi Belgian striker inhliam vanga buai tur an ni lo.

Sevilla tan hliam vangin Marco Andreolli leh Michael Krohn-Dehli te an inlan thei dawn lo a, Arsenal player hlui Sevilla captain ni ta Jose Antonio Reyes chuan ngai la awh lo mah se a ṭul huna hman theih turin bench-ah a ṭhut rin a ni.