Tute nge Sevilla?

Liverpool-in Jurgen Klopp-a hnuaia an nomawi hmasa ber chawi turin hun ṭha an nei a, Europa League final kalkawnga match 14 an khelha vawi khat chiah tlawm hmel hmu Liverpool tan champion turin match khat chiah chak a ngai tawh a, Liverpool club kan hrechiang a, English club lian kalkawng dal tumtu club erawh kan la hrechiang tawk lo.

Sevilla hian La Liga lamah pasarihna nichungin season khar mah se cup competition-ah erawh ngaihthah chi an ni lo. Europa League final an luh bakah Spanish Cup final an lut tawh a, final pahnihah hian an chak ve ve a nih chuan kum 10 chhunga an nomawi 10-na an chawi thei dawn tihna a ni.

UEFA Cup/Europa League-ah Sevilla in nomawi pali an chawi tawh a, 2005-06, 2006-07 season-ah a zawnin an champion a, 2013–14, 2014–15 ah a zawna champion lehin tun season-ah an champion leh a nih chuan Europe inelnaa a zawna vawi thum champion thei hmasa ber club an ni ang.

Kum 2001-a Liverpool-in UEFA Cup nomawi an chawi lai kha chuan Sevilla hian an nomawi dawhkanah Europe inelnaa nomawi hlawh chhuah hun tur an la nei lo a, La Liga hnuaia Segunda Division-ah an khel bawk. Mahse, kum 2006 UEFA Cup final-ah khan Spanish club hian Steve McClaren-a enkawl Middlesbrough chu 4-0 in an sawp a, kum 58 chhunga an club nomawi chawi hmasak ber a ni.

Tu nge coach?

Sevilla manager Unai Emery hi season ṭan dawn khan West Ham United chuan an club enkawl turin an lo rim tawh a, mah se Spanish manager hian an ram club-a cham chhunzawm zel a thlang.

Kum hnih chhung a zawna Sevilla-a Europa League nomawi a chawi hmain kum 44-a upa manager hian Lorca Deportiva, Almeria, Valencia leh Spartak Moscow-te a enkawl tawh a, player a nih laia midfield-a khel ṭhin manager hian a kum zat ngaihtuahin tawnhriat a ngah hle.

Sevilla manager hlui Juande Ramos chuan, "Sevilla hian manager tam tak an zawn hnuah an beisei ang an hmuh loh avangin Unai Emery an ruai a, he manager hian a hnathawh ropui tak avang hian fak a phu a ni," a ti.

Player langsar

Kévin Gameiro: Kum 29-a upa forward hian tun season-ah inelna hrang hrangah goal 27 a khung tawh a, Paris Saint-Germain forward hi a khelh
ṭhat zan chuan defender tan buaipui tham a ni.

Grzegorz Krychowiak: Arsenal nena sawi zawm hlawh mek defensive midfielder hi Sevilla final kalkawnga an player pawimawh a ni a, season hmasa La Liga team of the season-a lang phak midfielder hi season tharah Europe club liana kan hmu a nih pawn a mak lo ang.