Theihtawp kan chhuah ang - Klopp

Liverpool manager Jurgen Klopp chuan Sevilla lakah tih mai mai an tum loh thu sawiin, "Game harsa tak a ni dawn tih a chiang a, khelmual chhungah theihtawp chhuahin team pahnih kan inbei ang. Nomawi chawi tur chuan theihna zawng zawng pek a ngai a, team pahnihah chak tur chiang sa kan awm lo," tiin Spanish team lakah inkhel hautak an hmachhawn a rin thu a sawi.

Klopp chuan sawi chhunzawmin, "Game boruak sang tak kan khel dawn a, mah se game boruak a san poh leh kei chuan nuam ka ti ṭhin. Final thlen hi kan phu a, final thleng chin champion phu lo an awm ngai lo bawk. 100% in kan theihna kan pe ang," tiin tih mai mai a tum lo.

German manager chuan an dinhmun chu a beisei phak loh a nih thu sawi nghalin, "Anfield ka pan ṭantirh khan hnathawh tur tam tak a la awm avangin Europa League final kan luh nghal hi ka beisei ngam lo. Anfield-ah match ropui tak tak khelin ka nauten inkhel hmuhnawm tak tak an chhawp chhuak ṭhin a ni," tiin a naute khelh dan a chhuan thu a sawi.

Sevilla coach Unai Emery chuan Liverpool an hmachhawn tur chu an huphurhna aia an phurna a san zawk thu sawiin, "Liverpool kan hmachhawn tur hi kan tan chuan chona a ni a, history ropui tak nei leh Europa League-ah ngei pawh sulhnu tam tak lo hnutchhiah tawh club kan hmachhawn dawn a, a chak zawkin Champions League kan khelh dawn bawk avangin a phurawm a ni. Kan tana chona phurawm ber erawh club lian tak hneha champion nomawi chawi theihna hun ṭha kan nei tur hi a ni," tiin a phur hle.