FIFA president India-ah lo zin dawn

India football-in chanchin lawmawm a nei a, chu chu khawvel huapa football thuneitu sang ber FIFA president Gianni Infantino September-a a lo zin tur thu a ni.

Kumin February thlaa FIFA president thar atana thlan Infantino hian Spetember 27, 2016-ah India a lo thleng dawn a, Goa-a India football chungchanga workshop neih chu hmanpuiin AFC U-16 tournament final Goa-a khelh chu a hmunah a en dawn bawk a ni.

Hetihrual hian India rama football thuneitu sang ber All India Football Federation (AIFF) chuan hmeichhe league an siam tur thu a puang bawk a, kumin November-ah league hi ṭan hman beisei niin nakkum February-ah a tawp ang.

AIFF president Praful Patel chuan, "AIFF chuan AFC Women's Asia Cup-a kan tlin ngei theih nan a tih theih apiang a ti dawn a, hun engemaw chen hmeichhe league neih chung-chang kan sawi hnuah kumina neih kan ti tlu ta a ni," a ti.

India hmeichhe team hi world ranking-ah 58-na an ni mek a, 2018 Asian Cup qualifier hi nakkum April aṭanga neih ṭan tur niin Asia Cup-a ti ṭha zual team panga chu kum 2019-a hmeichhe World Cup khel turin an tling nghal ang.