Spain-ah Costa, Mata & Torres tan hmun a awm lo!

Euro 2016 khel tur Spain provisional squad puan a ni a, coach Vicente del Bosque chuan player 25 zingah Chelsea striker Diego Costa, Manchester United midfielder Juan Mata leh Atletico Madrid striker Fernando Torres-te a ko tel lo. Player 25 aṭang hian player pahnih paih an ni leh dawn a, final squad hi May 31 thleng tihchianna hun pek an ni.

Spain tan vawi 10 a inlana goal khat chiah la khung Costa hian season bul ṭan ṭha lo mah se Guus Hiddink-a'n Chelsea a enkawl hnuah ngai awh chhoin tun season-ah goal 16 a khung a, league match hnuhnung pahnih erawh hliam vangin a khel lo thung.

Manchester United season hman chhiat kum ni mah se Juan Mata hian game chhe tak a khelh ngai loh avangin koh a ni lo hi a mak a, Atletico Madrid-in season duhawm tak an hmanna kawnga player ṭangkai Fernando Torres koh a ni lo hian sawi a hlawh zui viau bawk.

Player langsar dang zingah Bayern Munich defender Javi Martinez leh Arsenal midfielder Santi Cazorla te pawh koh an ni lo a, kum 35-a upa striker Aritz Aduriz chu koh zingah a tel thung. Athletic Bilbao striker hian tun season-a in elna hrang hranga match 55 a khelh aṭangin goal 36 a khung a, Spain tlarhma lamah an rinrawl a nih a rinawm.

Spain squad-ah hian ram tana la inlan miah lo pahnih koh tel an ni a, Atletico Madrid midfielder Saul Niguez leh Real Madrid forward Lucas Vazquez-te chu koh zingah hian an tel a ni.

Squad

Goalkeepers: Iker Casillas (Porto/POR), David De Gea (Manchester United), Sergio Rico (Sevilla)

Defenders: Jordi Alba, Gerard Pique, Marc Bartra (all Barcelona), Sergio Ramos, Dani Carvajal (Real Madrid), Cesar Azpilicueta (Chelsea), Juanfran (Atletico Madrid)

Midfielders: Sergio Busquets, Andres Iniesta (both Barcelona), David Silva (Manchester City), Mikel San Jose (Athletic Bilbao), Koke, Saul Niguez (both Atletico Madrid), Cesc Fabregas (Chelsea/ENG), Thiago Alcantara (Bayern Munich), Isco (Real Madrid), Bruno Soriano (Villarreal)

Forwards: Pedro Rodriguez (Chelsea), Alvaro Morata (Juventus), Aritz Aduriz (Athletic Bilbao), Nolito (Celta Vigo), Lucas Vazquez (Real Madrid)