I League OUT Indian Super League IN

AIFF leh sumdawnna lama a thawhpui IMG-Reliance (ISL neitu) ten Thawhlehni khan Delhi-ah Indian football hmasawnna atana ruahmanna an siam chu football club aiawhte hmaah an tlangzarh.

May 12-a AIFF hruaituten Aizawl an tlawh ṭumin AIFF senior vice president Subrata Dutta chuan India football hmel thlak danglam tura hmalakna an neih thu Vanglaini palai hnenah sawiin an ruahman dan chuan ISL, League One leh League Two-a nih tur thu a sawi a - hei hi Thawhlehni khan an puang chiang ta a ni.

Kalphung thar tura ruahmanna hi Indian Super League club-te tan hamṭhatna tur a tam laiin I League club tan erawh chhiatrupna pawh a thlen thei?

AIFF ruahmannaah hian India ram football-a sulhnu nei ṭha club Mohun Bagan, East Bengal, Salgaocar FC leh Sporting Clube de Goa te an lungawi lo hle.

A chung berah ISL

Kum hnih liam ta khan kalphung mumal nei miah loin ISL chu din ṭan a ni a, FIFA pawmpui loh inelna a ni. I League aia sum a tam zawk miau avangin ISL-ah player langsar an tam a, thuthar thehdarhtute'n uar takin an thehdarh bawk.

Amaherawhchu ISL hi Asian Football Confederation (AFC) nen a inzawm loh avangin I League chu India rama football inelna sang ber a ni chhunzawm zel. I League champion-in AFC Champions League qualifier an khel a, I League club te inelna Federation Cup champion-in AFC Cup a khel bawk. ISL club tan AFC hnuaia inelnaah hmun a awm lo!

AIFF-in sum a hmuhna IMG-Reliance a ngaih pawimawh avangin IMG-Reliance duh ang takin kum hnih hnuah India ram football hmel a danglam dawn.

2018-19 season aṭangin Indian Super League chu India rama football inelna sang ber a ni ang a, season thar awm tur hi I League tawpna tur a ni. ISL hnuaiah hian League One leh League Two a awm ang.

League pathum hi November leh March thla chhunga khelh a ni ang a, thla nga chhung awh turin ruahmanna siam a ni.

ISL chu

2018-19 season aṭanga ṭan tur ISL-ah hian ruahman dan chuan pariat aia tam an awm dawn. Tuna ISL club pariat Atletico de Kolkata, Chennaiyin FC, Delhi Dynamos, FC Goa, Kerala Blasters, Mumbai City, NorthEast United leh Pune City bakah dan zawm thei club an tel belh ang a, a zat chiah tihchian la ni lo mah se pahnihin an belh tura ngaih a ni. ISL champion hian AFC inelnaah India ai an awh tawh ang.

He ruahmanna hi AIFF senior vice president Subrata Dutta chuan sawi langin, "ISL-a tel tur tan dan zawm tur kan duang ang a, sum neih ngai zat thlengin kan tarlang ang a, sum nei ngah tan tel a awlsam dawn tihna ni," a lo ti tawh. "North East team tan sum a ngaih hnem chuan tel a har tawh dawn tihna em ni?" tia Vanglaini palai zawhna chu, "Sum sen ngai zat a tam dawn a, a harsa ang," tiin chhang.

Hun eng emaw chhung chu ISL aṭang hian relegate an awm dawn lo a, League One aṭangin league sang berah hian an inhlangkai thei lo bawk ang.

Bengaluru FC official pakhat chuan AIFF-in thutlukna an siam hma hian ISL club te nen huang khata awm pawi an tih loh thu Vanglaini palai an lo hrilh tawh a, I League champion hi ISL hmun ruak pahniha pakhat zawk luah tura ngaih an ni.

Club pakhat dang tur erawh hriatthiam a har - I League club lian dangte hi AIFF leh a partner IMG-Reliance ruahmanaah an lungawi lo. India ram league sang berah Kolkata Derby a awm tawh lo turah a ngaih theih a, a awm lo tak tak a nih chuan India ramin inkhel pawimawh tak a chân dawn tihna a ni lawi si.

Inhmuhkhawmnaa I League club thuneitute chuan, "ISL-ah hmun kan nei lo. League One chu lo khel ta reng pawh ni la, India ram league sang bera kan kai chhoh theih si loh chuan eng nge kan khelh ve reng hi a ṭulna ni ang?" tiin an lungawi loh thu an sawi.

AIFF president Praful Patel chuan, "Lo dawh hram hram rawh u. East Bengal leh Mohun Bagan-te hi India ram football-a an hlutna hre lo kan ni lo a, AIFF hian Kolkata club leh club dangte tan ruahmanna an siam vek a ni," tiin a sawi.

League hnuailam chu

ISL hnuai chiaha awm tur League One hi ruahman dan chuan tuna I League club-te awmna tura tih a ni. League Two erawh I League 2nd Division club-te tana awmna tura ruahmanna siam a ni thung.

League pahnihah hian club 10 ve ve awm tura duan a ni a, league pahnih inkarah hian relegation leh promotion a awm thung ang. League Two-ah hian India rama inelna liana lang pha lo state Bihar, Nagaland, Uttar Pradesh leh a dangte chu duhsak an ni ang

Eizawnna kawng thar?

AIFF chuan football player-te'n eizawnna mumal zawk nei se an duh. League One (second tier) leh League Two (third tier) ah hian club 20 awm se, player 25 zel an chhawr chuan player 500 laiin eizawnna an nei dawn. ISL-a khel tur player te nen chuan player 650 an tling pha dawn tihna a ni.

India rama football thuneitu sang ber chuan kum 2020-ah chuan league chhawng lina (fourth tier) siam a, ram pumah club 50 inelna buatsaih theih an tum.

Super Cup

Durand Cup dawta India rama knockout inelna upa ber dawttu Federation Cup chu Super Cup tia thlak a ni tawh dawn. League pangngai zawhah neih ṭhin a ni ang a, April leh May chhunga neih tura ruahman a ni.

Ruahman ang chuan Super Cup-ah hian ISL aṭangin team pariat, League 1 aṭangin team pali leh League 2 aṭangin qualifier khel turin club pali an tling bawk ang.

Ruahmanna dang

AIFF chuan India National team-te FIFA ranking-a an san chhoh theihna turin international match tam zawk khelh an tum. Nehru Cup tih ṭhin chu Champions Cup tia thlakin kum tin August thlaa khelh tura ruahman a ni.

Delhi, Goa, Mumbai, Kolkata, Guwahati leh Kerala ten U-17 World Cup an thlen dawn avangin 2017 Champions Cup hi Bangalore emaw Chennai-ah emaw khelh a ni ang.

India-in kum khata match kua an khelh ṭhin chu 15 tala kai chhoh an tum a, FIFA ram ten international match an neih rualin harsatna nei loin an tel ve thei tawh ang.

AIFF chuan ISL, League One leh League Two club awm lohna state-ah grassroots programme changtlung tak buatsaih a tum bawk a; referee ṭha zawk chher tuin ṭan lak an tum bawk a ni.

India hmeichhe team lamah pawh AIFF-in ṭan lak a tum a, kum khata match nga an neih ṭhin chu match 10-ah tihpun chhoh an tum. India hi ranking-ah 58-naah an awm mek a, April 3-11 chhung khian 2018 Asian Cup qualifier an khel ang. He inelnaa ti ṭha panga te chu France rama khelh tur 2019 World Cup khel turin an tling ang.

Thlirna Tawi

• 2016-17 season zawhah I League a tawp dawn.

• 2017-18 season aṭangin ISL chu India rama inelna sang ber a ni ang.

• ISL hnuaiah hian team 10 ve ve awmna League One leh League Two a awm ang.

• ISL-ah hian tuna ISL team pariat hi an awm nghal ang a, club awm belh zat tur erawh a hriat loh.

• ISL club te hi League One-ah an tla thei dawn lo a, League One club-te pawh ISL-ah an kaisang thei bik lo.

• ISL champion hi AFC hnuaia inelnaah an tel tawh ang.

• Federation Cup hi Super Cup-ah thlak a ni ang a, Super Cup champion hian AFC Cup an khel ang.