United chak; UCL khel phak lo

Manchester United chuan Thawhlehni zan khan Old Traf-ford-ah Wayne Rooney, Marcus Rashford leh substitute Ashley Young te goal hmangin AFC Bournemouth chu 3-1 in an hneh a, Cherries goal hi United defender Chris Smalling-a'n hun pek belha an mahni lama a tihluh a ni.

Premier League palina Man-chester City nena point 66 ve ve hmutu Louis van Gaal-a hote season thara Europa League lama an lungawi a ṭul ta.

UCL mangṭha

Inkhelh ṭan hmain Manchester United-in chhiarkawp danin Champions League an la khel thei a, goal 19 zeta chak a ngaih avangin beisei ngam chi a ni lo.

United hian Europe inelna sang ber beisei ngam lo mah se Bournemouth-in khelh chhan tur a neih tawh loh avangin Louis van Gaal-a hote tan Southampton chunga awm turin harsatna an tawk lo thung.

Roo 'The Midfielder'

United captain Rooney chu midfielder hna pek a ni a, vawi 100 lai a ṭhiante ball pein a ball pass dik percentage chu 88% niin vawi 65 pass hi khingpuite lamah a ni.

Rooney hian vawi 115 zet ball a khawih a, United ball an chan theih nan Bournemouth player-te vawi 12 zet a chhuh sak. England captain hian goal theih tura ngaih pass vawi thum lai a nei bawk.

Tehna hrang hrang a chunga tarlanah hian Rooney hi United player zingah a ṭha ber.

England captain Rooney chuan, "Kan kawng zawh tur thlan hun a awm a, tunah chuan hma tawngtu ni loin ka tawlh hnun a ṭul tawh a ni. England-ah erawh striker ka la ni thei a, season tharah chuan midfield hi ka awmna tur niin ka inhria," tiin a position chungchang a sawi a, chutihrualin ram lamah chuan Roy Hodgson a thutlukna a pawimawh ber thu sawi a tel bawk.

Rashford - Euro Ticket?

Player 26 awmna England squad-ah Rashford telh a ni a, paichhuah leh mai erawh a harsa dawn. Kum 18-a upa hian goal a khung bakah Rooney-a'n goal a khung theih nan nalh takin Anthony Martial-a pass chu a dummy bawk.

Rashford hian United tan Inrinni zanah FA Cup final a la khel dawn a, goal a khung nawn leh chuan England jersey nena Euro 2016-ah a inlan a nih pawhin a mak lo ang.

Golden Glove - Cech

United keeper David de Gea chuan Premier League golden glove dawng turin Cherries lakah goal chhuah loh a mamawh a, amaherawhchu hun pek belhah Chris Smalling chuan an lamah a ti lut.

Spanish keeper a vanduai a, vawi 15 clean sheet neiin Petr Cech a phak lohna chu clean sheet vawi khat chiah a ni. Arsenal keeper hian Golden Glove chawimawina ṭum li a lo dawng tawh a, 2013/14 season-ah erawh nen Wojciech Szczesny an inṭawm thung. United keeper De Gea hian Premier League Golden Glove chawimawina hi a la dawng lo.

Beisei a sang mah mah

United manager Louis van Gaal chuan, "Supporter-te an hnual hi ka hrethiam a, amaherawhchu beiseina a sang mah mah. Kan hmalam hun hi helai hmuna ka rawn thlen tirh khan ka sawifiah tawk lo a, thlak danglam hunlai a nih avangin chetṭhat a harsa a ni. Chutihrualin kan dam kim vek lai chuan pakhatna a ni a, chu chu thudik a ni," tiin an dinhmun chungchang a sawi.

Dutch manager chuan Bour-nemouth an hneh chu FA Cup atana inbuatsaihna ṭha tak a nih thu a sawi a, Rahsford chu goal khung thei striker tiin a fak tel bawk.