NBA Conference Finals Cavaliers an chak nuamsa nghal

Nimin zing khan NBA Eastern Conference Finals Game 1 khelh a ni a, Cleveland Cavaliers chuan nuamsa takin Toronto Raptors lakah 115-84 in hnehna an chang. Zirtawpni zing dar 6:00-ah Game 2 an khel leh ang.

Quicken Loans Arena, Cleveland-a inkhelah mualneitu Cavaliers lamin inkhel bul an ṭan ṭha zawk a, quarter hmasa berah 33-28 a hma hruai nghalin a tawp thlengin an hawi kir tawh lo. Quarter tinah chungnung zawk vekin an inthlauh lai berin point 35 zet a ni hman a, a tawpa an inthlauhna chu point 31 zet a ni!

Cavaliers tan LeBron James chuan point 24 score-in a langsar leh pek hle a, point 27 score tu Kyrie Irving chu score hnem ber niin Kevin Love-a'n point 14 a score bakah rebounds ṭum li a la bawk. Kumin playoff bikah Love hian double-double a neih loh vawi khatna a ni nghe nghe.

Kum 2012 khan NBA playoff bikah hian San Antonio Spurs chu a zawnin match kua ngawt an chak zawn tawh a, he mi hnuah Cavaliers hi match kua chak zawn leh thei hmasa ber an ni.

Toronto Raptors point guard Kyle Lowry chuan, "LeBron hi tunlaiah chuan player ṭha ber te zinga mi a ni a, NBA chanchinah chuan sulhnu nei ropui ber zinga mi a ni bawk. Regular season ai chuan tuna kan khelh mek hi a pawimawh zawk a, kan khelh ṭhat tluan avang hian beiseina kan nei sang hle," tiin a sawi.