Bournemouth-in West Ham dilna an hnawl

Bournemouth chuan West Ham-in an striker Callum Wilson leh mid-fielder Matt Ritchie lei nana pound maktaduai 20 an thehchhuah chu an hnawl sak.

Kum 24-a upa Wilson hi a khup na vanga thla ruk chhung a inkhelh theih loh hnuah April thla khan a inkhel ve leh thei ṭan chauh a, Coventry player hlui hian nikum September thlaa Stoke City nen an inkhelh ṭuma hliam a tuar hma hian season tir lam khan match sarih a khelh aṭangin goal nga a lo khung hman tawh.

Kum 26-a upa Ritchie hian 2013 khan Swindon aṭangin Bournemouth hi a zawna, a khelh ṭhat ṭhin avangin ram tana khel tur pawha koh a ni tawh. Thu thar ṭhenkhatah chuan Hammers hian player pahnih lakchhuah nan hian pound maktaduia 25 pawh an phal tawh nia sawi a ni bawk.

Cherries manager Eddie Howe chuan, "Manchester United nen kan inkhelh zawh khan kan player lei dilna West Hman aṭangin kan dawng a, mah se kan hnawl. Kan squad tih chhah zel kan tum avangin player ṭha chhuah tir tumna kan nei lo," tiin a sawi.

Bournemouth hian season lehah Premier League an khelh chhun-zawm dawn a, an player hmanthiam sa chelh theih hi hna pawimawh a ni. Hetihlai hian Champions League beisei ngam West Ham tan player ṭha lakluh a pawimawh thung bawk.