Sunday-a'n Fed Cup final a khel dawn - Das

19th May, 2016

Fatorda Stadium-a Aizawl FC leh Sporting Clube de Goa inkhelh ṭumin hun tawp hnaiah Nigerian striker Joel Sunday-a'n hun khawhral vangin yellow card a hmu a, coach Jahar Das chuan Vanglaini palai hnehah Nigerian striker hi hrem vangin Federation Cup final a khelh loh tur thu a hrilh.

Nimin zing khan Aizawl FC hian Lammualah practice an nei a, hemi ṭum hian Bengali coach Das chuan, "Ka hriat sual a ni. Match hmasa lama Kimkima (Lalchhawnkima) yellow card hmuh nen khan ka hriat pawlh a, Sunday khan Sporting Goa lamah tun inelnaa yellow card vawi khatna a hmu chauh. Chuvangin Sunday hi Mohun Bagan lamah kan chhawr thei dawn a, thu lawmawm a ni," tiin Joel Sunday an chhawr theih tur thu Vanglaini palai a hrilh.

Guwahati pan dawn

Aizawl FC hian tukin zing hian Lammualah training an nei ang a, chawhnu lamah Federation Cup khelhna tur Guwahati an pan ang. Fed Cup final hi May 21, Inrinni zan dar 7:00 hian Indira Gandhi Stadium-ah khelh a ni dawn a, MPL champion hian Guwahati-ah Zirtawpni hian training an nei leh ang.

Mohun Bagan coach hlui Das chuan, "Final khel tur hian player 18 bakah captain David-a te kan hruai ang. Final Squad thlang tur hian coach te kan inrawn khawm ang a, training hnuhnung berah Guwahati-a zin tur kan puang ang," tiin a sawi.

Aizawl FC captain David Lalrinmuana hi Sporting Goa nena an inkhelh ṭumin injury time-ah hun khawhral vangin yellow card vawi hnihna a hmu a, hnawhchhuah a nih avangin final-ah a inlan dawn lo.

Boruak ṭha

I League aṭanga relegate vangin Aizawl FC an hnual a, amaherawhchu khelmual chhungah an tihtur an ṭhulh phah lo. Mizo club-in Federation Cup-ah India ram club dangte an elpha tih lantirin final an lut a, team boruak pawh a ṭha hle.

Aizawl FC boss Jahar Das chuan, "Semifinal-a Sporting Goa kan hmachhawn hma khan club president (Robert Romawia Royte) chuan final kan thleng a nih chuan mimal tin hnenah cheng sing khat a tiam a, player-te pawh an phur phah hle. Team chhung boruak a ṭha a, Mohun Bagan hi kan hneh thei tih kan hre tawh a, kan inringtawk hle," tiin an rilru thlenga an inpeih thu a sawi.

Player-te a fuih dan sawiin Das chuan, "Aizawl FC hi chu a kal zel dawn a, player-te erawhin hun tam an nei lo. Final an thlen avangin an hlutna chu a let hnihah a pung tawhah ka ngai a, finala an khelh dan a zirin an hlutna hi a let thum emaw a let li emaw thleng pawhin a pung thei dawn. Player-te hi an hlutna ti tam zel turin ka fuih a, an hrethiam viauin ka hria," tiin Vanglaini palai a hrilh.

Saturday-ah Sunday

Federation Cup-a goal li khung tawhtu Joel Sunday chuan, "Mohun Bagan hi kan hneh thei a ni. Kolkata club lakah hian goal ka khung theih lohna tur ka hre lo a, khung kan tum bawk ang. Football-ah thil theih loh a awm lo a, Pathian ṭanpuinain kan ti thei a ni," tiin goal khung chhunzawm zel a tum thu a sawi.

Nigerian striker Sunday hian Kalighat Milan Sangha FC tana a khelh laiin Mariners hi vawi khat a hmachhawn tawh a, goal a khung lo. March 26 khan RG Stadium-ah Bagan hi a hmachhawn leh a, Sunday hian Aizawl FC jersey nen goal hmahruai khungin 2-1 in hnehna an chang. Tun ṭum hi Sunday-a'n Mohun Bagan vawi thum a hmachhawnna tur a ni.

Aizawl FC goal khung khawl Sunday chuan, "Federation Cup final hi ka career-a match pawimawh ber tur a ni a, ka theihna zawng zawng nen ka khel ang," tiin Mariners nena an inkhel tur chu a lak thutak tur thu a sawi.