Thailand-ah Leicester City an zin

Premier League cham-pion Leicester City chuan an khawpui ngeia an champion an lawm zawh hnuin Thailand lam an pan a, club neitu Thai sumdawng hausa Vichai Srivaddhanaprabha-a te khua Bangkok-ah anmahni lawm turin fans an pungkhawm hnem hle.

Kum ruk liam ta a Vichai Srivaddhanaprabha-a'n Leicester a lei hnuah Foxes hian Thailand an tlawh fo a, tun season
ṭan hmaa an tlawh ṭuma an mualpho avangin player ṭhenkhat leh coach Nigel Pearson-te chuan ban an tawh phah hial a ni.

Kar khat chhung Bangkok-a hun hmang tur Leicester City squad-ah hian an player langsar zingah Jamie Vardy leh France midfielder N'Golo Kante-te chu Euro 2016 puala an inpuahchah a ngaih avangin an tel ve lo a, Riyad Mahrez hmel hmuh tur a awm lo bawk.

Leicester captain Wes Morgan chuan, "Thailand-ah hian kan lokal fo tawh a, vawiin ang em ema ropui erawh kan la tawng ngai lo. League champion kan nih hnuah Premier League nomawi hi eng ang chiaha hlu nge a nih ngaihtuah tumin inbuatsaih mah ila Leicester khawtual aṭanga he hmun kan thlen thleng hian thil ropui tak tak hlir kan tawng a, kan la in thing harh thei meuh lo a ni," tiin an club hlawhtlinna chu mumang ang mai a nih thu a sawi.