Chelsea-ah Terry cham dawn

English defender John Terry chuan kum khat atan Chelsea-ah contract a ziah belh.

Premier League match hnuhnung bera Blues-in Leicester City an hmachhawn zawhah kum 35-a upa Terry chuan lung kuai takin Stamford Bridge-a cham zel a duhthu a sawi a, London club hian Frank Lampard con-tract an zawrh tawh loh avangin Blues captain pawh hi chhuak mai tura sawi thawm a ring hle.

Veteran defender Terry chuan, "Mi zawng zawngin Chelsea-ah ka nghet tih an hria. Tunah chuan coach thar hnuaia season thar chungchang ka thlir thei tawh a, kan hmabakah hlawhtlinnain min hmuah ngei ka beisei," tiin player angin season thar a thlir.

Terry hian kum 1998 khan Stamford Bridge-ah a professional career a ṭan a, Blues tan hian vawi 703 zet a inlan tawh bawk.

Club chairman Bruce Buck chuan, "John-a'n kum khat chhung min uap leh dawn tih kan hriat hian kan lawm hle a ni. Chelsea-ah hian kan hruaitu a ni a, tun hnai mai khan match 700 a khel tling a, chu chuan club tan a inpe a ni tih chiang takin a tarlang," tiin Terry a fak.

Chelsea-ah Terry hian Premier League title pali, FA Cup panga, League Cup pathum bakah Champions League leh Europa League nomawi vawi khat ve ve a chawi tawh bawk.