Aston Villa an hralh hnai

Premier League aṭanga tla hlim Aston Villa chuan neitu thar an nei hnai niin khawthlang media-te chuan an tarlang a, season thar aṭanga Championship lama khel tur Villa hi Chinese sumdawng hausa a hming tarlan loh chuan pound maktaduai 60-a lei a tum niin an sawi.

Aston Villa neitu American sumdawng hausa Randy Lerner hian August 2006 khan Villa hi pound maktaduai 62.6-in a lei a, kum 2014 khan club-a awm zel chia a inngaih loh thu sawiin club hi a lo zuar tawh. Club lei duh awm nual mah se indawrna a hlawhchham zel avangin Lerner-a'n Villa a enkawl chhunzawm a, tunah erawh Premier League club niloin Championship club an nih a ṭul dawn ta.

Premier League-a point 17 chiah hlawh chhuaka table mawngphah luahtu club lei tum hian Chinese sumdawng hausa leh a hote chuan Villa sum dinhmun an thli thlai mek nia sawi a ni a, ruahman anga engkim a kaltluang a nih chuan tun kar tawpah chuan Villa hian neitu thar an neih rin a ni.

Manager thar

Aston Villa neitu thar tan ngaihtuah hmasak ber tur chu club manager tur a ni ang. March thla tawp lama Remi Garde ban a nih hnuah Villa hian manager pangngai an la nei leh lo a, Garde hmun ruak luah tur hian Nigel Pearson leh Roberto di Matteo-te hming lamrik a ni.

Leicester City boss hlui Nigel Pearson hian Foxes a enkawl laiin League One nomawi a chawi bakah Championship nomawi a chawi bawk a, Premier League-a Foxes kan hmuh chhan hi English manager vang hi a ni.

Di Matteo hian nikum May thlaa Bundesliga club FC Schalke a chhuahsan hnuah club enkawl a la nei leh lo a, kum 45 leka upa a nichungin a sulhnu erawh a chhuanzawm hle.

Italian manager hian kum 2009 khan West Brom enkawlin a season hmasa berah Premier League khel turin a hruai kai nghal a, kum 2011-ah ban a ni. Baggies a chhuahsan kum vek hian player a nih laia a khelhna Chelsea-ah assistant manager hna a chelh ṭan a, a kum leha Andre Villas-Boas ban a nih hnuah Chelsea manager hna a chelh lailawk a, Blues hi FA Cup leh Champions League-ah a champion pui!

Mahse, Di Matteo hi a con-tract ziah kum vek hian ban lehnghal a ni a, kum hnih a chawlh hnuah Schalke zawmin amah duh thuin German club hi a chhuahsan thung a ni.

Sum sen belh

Aston Villa leina man zat hi pound maktaduai 60 chauh angin lang mah se Villa lei tur tan sum sen belh tur a tam dawn. Premier League aṭanga an tlak chhana mawhphurtu a nih thu pawmtu Villa neitu Lerner hian club hmangaihtu tak tak hnenah lo chuan Aston Villa a hralh loh tur thu a sawi tawh a, 2014-a club a zuar chunga a hralh loh chhan pawh hei hi a ni.

Manager thar leh a ṭhuih-hruai-te rawih nan sum sen a ngai ang a, chief executive officer, finance director leh commercial director-te hi a thar vek rawih an ngai dawn bawk a, sum sen belh tur hi a nep lo.

Villa-ah Keith?

Aston Villa manager thar tur hming lamrik a nih rualin Everton chief executive hlui Keith Wyness chuan Villa Park hi a pan dawn nia sawi a ni. Goodison Park-a kum nga chhung hun lo hmang tawh Keith hian football khawvel sumdawnna kawngah tawnhriat a ngah hle a, football club hralh leh lei, stadium thar sak leh din chungchangah consultant niin China thlenga hming langsar a ni - ani rawih man hi a tlawm lo ang.