France kan hlau bik lo - Ozil

Arsenal playmaker Mesut Ozil chuan Germany chu Euro 2016 champion tura rinkai ber an nih thu leh a thlengtu France an hlauh bik loh thu a sawi chhuak.

Germany hi FIFA World Cup cham-pion lai an ni a, mah se Brazil-a an champion ṭuma an hotupa Philipp Lahm leh srtiker Miroslav Klose ten internatinal football an chawlhsan zui.

Kum 27-a upa Ozil chuan, "Germany hi champion tura rinkai ber kan nih loh pawhin team ṭha berte zinga mi chu kan ni ngei ang. France hi anmahni rama khel tur an nih bakah player ṭha an ngah avangin khelh an harsa dawn a, mahse World Cup thlengtu Brazil pawh an ramah kan hneh tawh," tiin a zam lo hle.

Ozil chuan inrintawkna an neih san thu sawi chhunzawmin, "Eng inelnaah pawh a thlengtu chuan ṭawiawmtu fans an nei ṭha ṭhin a, mahse Germnay kan nih avangin khawvela eng team pawh hmachhawn thei turin kan inbuatsaih a ni. World Cup zawh khan senior player ṭhenkhawt chawl mah se naupang ṭha dang an rawn chhuah ve zel avangin team ṭha kan la ni reng," tiin a sawi bawk.

Germany hian an match hmasa ber atan June 12 khian Ukraine an hmachawn dawn a, Group C-ah Northern Ireland leh Poland an hmachhawn zui bawk ang.