Hull ban phakah Premier League

Thawhlehni zan khan Cham-pionship playoff semifinal hnuhnung zawk khelh a ni a, Hull chu an mikhual Derby County lakah 2-0 in chak lo mah se first leg-ah 3-0 a hnehna an lo chan tawh avangin inkhel pahnih blehkhawmah 3-2 in Championship playoff final khel turin an tlang.

KC Stadium-a inkhelah Derby chuan first leg-a an si thum phurh sut zawh an tum ngam a ni tih inkhel ṭan tirh aṭangin an lantir nghal a, minute 7-na lekah striker Johnny Russell chuan goal khung nghalin an phur hle. Hull defender Andrew Robertson-a'n minute 36-naah anmahni lamah a tih luh palh bawk avangin final lut tur zawk a chiang tawh lo hle.

Second half-ah pawh Derby hian inkhel thunun chhunzawmin ball possession 63% zet an nei a, midfielder Chris Martin chuan goal khungna hun ṭha pawh a insiam thei mai. Mahse, Hull keeper Eldin Jakupovic a paltlang zo lo a, Derby-in goal khung tumin vawi 16 zet pet mah se goal zawnah ṭum hnih chiah an pet theih avangin an beisei a tawp a, a zawna a season kua nan Championship-ah hun an hman a ṭul dawn ta a ni.

Hull hma hian Sheffield Wed-nesday chuan Brighton hnehin Championship playoff final khel turin an lo in pet tling tawh a, May 28 khian season thara Premier League khel tur hmunruak pakhat la awm chu an inchuh ang.

Hull City boss Steve Bruce chuan, "Derby khan fak an phu a, darkar khat chhungvel rilru buai leh mangang takin min siam a ni. Inkhel pahnih belhkhawma goal khung tam zawk kan nih miau avangin final khelh kan phu," tiin a sawi.

Derby County manager Darren Wassall chuan, "Zaninah khan mipui ten eng ang taka ṭha nge kan nih chu an hmu chiang hlein ka ring. Kan vanduai vang chauh a final khel thei ta lo kan ni," tiin a naute a sawisel duh lo.