Premier League awptu Pep-a leh Man City

Pep Guardiola kaihhruai Manchester City-in a zawnin Premier League-ah vawi li an champion a, kum sarih chhunga vawi ruk an champion-na a ni bawk. Man City-in khawvela league harsa ber nia an sawi ṭhin Premier League an awp a, an record hi a ropui hle.

Pathianni zan khan Premier League match hnuhnung ber khelh a ni a, stadium 10-ah a rualin match 10 an khel. Round tawp berah hian champion thei pahnih an la awm avangin Eithad Stadium leh Emirates Stadium-ah nomawi sem theih mai turin an chhawp ve ve mah se Arsenal khelmuala an dah nomawi (replica) erawh phawrh chuah a ngai ta lo.

Etihad Stadium-ah City-in hma takah goal an khung a, Gunners erawhin goal an chhuah hmasa thung. Premier League tawp niah thil danglam a awm lo a, champion tura mi nawlpui rin sa City-in an mikhual West Ham 3-1 a hnehin an champion. Mikel Arteta hoten Toffees 2-1 in lehthal mah se an tum ram a thleng zo lo, season hmasa lam ang thoin pahnihnaah an lungawi a ṭul.

A goal hma

West Ham-in David Moyes hnuaia an match hnuhnung berah result ṭha duh mah se an khingpui Man City a nih bakah Pep-a hoten hian champion tura chak an mamawh avangin Hammers hi Etihad Stadium-ah a chet thei lo.

Champion duha tuihal Man City-in hma zawngin ball an in pass a, Hammers-in goal venhim tumin tlarhnungah player dah hnem mah se an dang thei chuang lo. Minute hnihna lekah Foden-a'n Bernardo Silva hnen aṭanga a ball hmuh chu vawi khat khawihah pet theih turin a dah a, box pawn aṭangin goal kilah kawh zetin a pet goal.

City an chungnung chhunzawm a, chance an inhlahsiak a ni ber. Goal khung khawl Erling Haaland a vannei tawk lo a, Norwegian striker hian a hun ṭha neih a hmang ṭangkai thei lo. Mahse, Foden erawhin Jeremy Doku hnen aṭanga a ball hmuh chu minute 18-naah a khung. City academy aṭanga inzir chhuak Foden-a'n goal hnih a khung a, Pep-a hoten champion turin hun tawp hamrik an nghak a ni ber.

West Ham winger Mohammed Kudus-a'n minute 42-naah mawi zetin bicycle kick goal mah se City an buai phah lo a, inkhel an thunun chhunzawm zel. Rodri-a'n minute 59-naah City goal thumna a khung a, mipui thawm a ring hle.

City tan hun tawp lamah thin phu ran theihna tur erawh a thleng a, West Ham-in minute 88-naah Tomas Soucek hmangin siphurh sut ṭhenah an inngai. Emirates Stadium lamah Kai Havertz-a'n hmahruaina goal a lo khung ve bawk. Mahse, VAR hmanga enlet hnuah ball-in Soucek kut a per a, goal-ah pawm a ni lo. City 3-1 in an chak a, point 91 hmuin Premier League-ah an champion.

A thlawn mai maw!

Arsenal-in kum 2004 hnua a vawi khat nan Premier League-ah champion an tum a, Mikel Arteta hnuaiah hma an sawn hle. Season liam ta khan Gunners hi an chesual a, season tawp thleng City an um thei ta lo, tun season-ah erawh round tawp ber thlengin Pep-a hote um mah se a vanduai zawkah an ṭang.

Gunners-in Premier League tawp niah Everton an mikhual a, chak pawh ni se City result-ah an innghat. Arteta hoten chak ngei tumin an bei a, pressure sangah goal an khung lawk thei lo. Minute 40-naah Idrissa Gueye freekick chuan wall perin goal-ah a lut a, mikhual team-in goal an khung hmasak zawk avangin Emirates Stadium an ngui.

Mahse, tun season Arsenal hi chu an puitling tawh. Minute thum hnuah Takehiro Tomiyasu hmangin siphurh an sut lehnghal a, mipui thawm a ṭha hle. Second half-ah na takin an nawr a, Kai Havertz-a'n crossbar a tauh per a, ṭum dang chu ni se vanduai hmahruaiah an ngai ang.

Tun ṭumah erawh goal hmaah an vanneih tawk loh hnuah pawh an beidawng lo a, minute 89-naah an thawhrim rah an seng. Gabriel Jesus-a'n Everton player ball inpe a chhuhsak a, ball-in a kut per mah se taksa beta a dah avangin hrem theih a ni lo. Jesus-a ball pek chu Martin Odegaard-a'n changin Norwegian midfielder hian Havertz tan a pe leh a, German midfielder hian chakna goal a khung.

Arsenal-in 2-1 in hnehna an chang a, point thum hlawh chhuak mah se an khingpui City an chetsual loh avangin pahnihnaah an lungawi a ṭul. Arteta hoten champion phu khawpin season an hmang ṭha a, chetfuh loh ṭum awm bawk mah se an vanduai. City nen an vul hun lai a inan kher avangin season zawnin nomawi hmangin an thawhrim rah an seng thei ta lo a ni.