Danke Jurgen - duhaisan ram min fan puitu!

January 26, 2024 a ni a, Liverpool manager, fan-te ngainat rawn leh hlawhtling Jurgen Klopp chuan, "Thathona reng ka nei tawh lo a ni," tiin Liverpool a chhuahsan tur thu a puang a, Reds ṭantute a barakhaih takzet a, football khawvel chu an phu suau a ni ber!

May 19, 2024 a ni a, Liverpool manager ni chunga Jurgen Klopp-a'n Liverpool fan-te a thlahna ni chu a thleng ta. Anfield-ah chuan 'Danke, Jurgen' (Kan lawm e, Jurgen) tih chu lian takin an tar a, fans 60,000 chuang pungkhawmtu chu Klopp-a hming lamin an zai a, hmun tinah Klopp-a hlimthla hmuh tur a awm a, a pui takzet.

Liverpool ṭantuten an aw rawl tawpin, an hla chuam "You'll never walk alone" tih hla chu an sa a, "Tu nge purun zai?" tih palh mai awl tak a ni - patling biangah mittui a luang a, Klopp meuh pawhin a mittui a dang zo lo. A ṭhuthmunah mittui nen a lo ṭhu a nih kha!

Inkhelh a hun a, ni danga khelmual sira sapatal ṭhin Klopp kha hahdam takin a ṭhu a, a nui a, a hun tawpah meuh chuan German coach lung fing meuh pawh a zuai a ni. Alexis Mac Allister leh Jarell Quansah ten goal an khung a, Wolverhampton Wanderers chu 2-0 in an hneh - Klopp-a hoa an match hnuhnung ber chu a tawp ta.

A tawp ta

Klopp meuh a chhuak dawn a, ropui taka thlah loh chi a ni lo. Liverpool neitupa John W Henry pawh Boston aṭangin Liverpool-ah a thlawk lut vang vang a, ropuina rama Liverpool hruai kirtu Klopp thlah loa awm a duh bik lo.

Khelmuala mittui parawl chunga Salah ding rengte chuan a tana Klopp hlutzia a hrilhfiah a, Virgil van Dijk-a'n a kuah vawng vawngte kha - an inpawhzia leh team ropui din tura an thawhhona ṭhatzia pholangtu a ni.

Fans lam hawi chungin Trent Alexander Arnold meuh pawh a ding reng a, a mittui kha tun an hmuh hmaih lo. A tan chuan a pa a thlah ang mai a ni a, Liverpool naupang chher hriam a, fan-te âtchilh rawn tura amah dintu thlah nana mittui a seng kha a awm lo hran lo e.

Liverpool legend Steven Gerrard chuan, "A lim an siam mek ka beisei a ni," a ti a, German coach chu Anfield-a a lim dinsak hial tlakah a ngai - eng nge kan sawi leh chuan ang? He ṭawngkam ringawt hian Reds ṭantute tana a hlutzia chu a hrilhfiah a ni lawm ni?

Beiseina neitu

Jurgen Klopp-a'n Liverpool a zawm tirh khan, "Beiseina reng nei lote chu beiseina kan siamsak leh ang," tiin a sawi a, a sawi ang ngeiin Reds ṭantuten beiseina thar an nei a, an ropui lai sawi dawn apianga "Hmanah chuan..." ti ṭhinte khan amah vangin "Tunah..." an ti ve ta.

Mahse, Klopp erawhin ama hnathawh bik a nih loh thu a sawi. German coach chuan, "Mi ṭhenkhatin an beidawn tawh hnuah an tan beiseina ka siamsak thu min hrilh a, mahse, kei chuan ka pawm ve lo. Beiseina hi midang min siamsak theih a ni lo a, keimahnia kan tih ve ngai a ni.

"Kei chuan beiseina kan neih leh a ṭul thu ka sawi ve a ni mai a, ka sawi angin beiseina innei leh mai a ni zawk. Keima tihbik a ni lo - chu beiseina chu inthlauh thla thiang hek lo. A chhan maw? He club hi dinhmun duhawm takah a ding mek a, hun rei tak chhung hetiang hi a tawng tawh lo tih ka hria.

"Stadium ṭha tak leh training centre changtlung tak kan nei a, kan thahrui pawimawh tawp khawk nangni in awm bawk. Beiseina kan neih leh neih loh te, kan hlim leh hlim loh te, engkim mai hi kan duhthlannaa innghat a ni e. In zinga mi ka ni a, inchungah rinna ka nghat tlat - 100% in beiseina ka nei zel dawn a ni," a ti.

Hello Slot

Liverpool fans tam takin an coach thar tur Arne Slot chunga beiseina neih thiam an harsat a, Dutch coach hi Liverpool enkawl tura a phur em avangin fans ṭhenkhat chuan an ringhlel - Liverpool a ropui lo lam a ni lo a, a enkawltu lam hi a tê lutuk em aw, tih zawk chu an zawhna a ni.

Mahse, Klopp cuan, "A chang chuan inthlak danglam hi a ngai ve fo a ni," a ti a, thil thar thleng tur chuan thil inthlak danglam a awm ve fo a ṭul thu a sawi - Klopp hian Sky Sports-in an kawmnaah pawh, "Liverpool-ah hian ka cham zel a nih chuan, a awm rei tawh lutuk, min ti mai ang," tiin a lo sawi tawh.

Klopp chuan, "Keimah min lo lawm ang tho khan manager thar pawh lo lawm ula ka duh a, a ni khatna aṭangin intheihna zawng zawng nen bei ula, beiseina nei tlat chungin, he team hi nawr kal zel rawh u," tiin fan-te a ngen zui.

German coach mize danglam tak hi, "Arne Slottttt...." tiin amah thlaktu tur hming lamin a zai a, fans sing telin an lo zawm zui - Klopp-a hmun ruak zau takah Slot a lut dawn a, thil chiang tak erawh, a bula ding turin Kop ho an awm e.