U20 NFC semifinal-ah Mizoram an chak lo

Swami Vivekananda U20 Men’s National Football Championship semifinal-ah Mizoramin nimin khan Delhi 3-2 in an hneh lo a, HC Zarzoliana hote tan nomawi beiseina a tawp.

Ramakrishna Mission Ashrama Ground, Chhattisgarh-ah nimin zing khan semifinal hmasa zawk khelh a ni a, Karnataka-in Manipur 1-0 in an hneh. Goal awmchhun hi minute 14-naah Saikhom Borish Singh-a'n penalty aṭangin a khung. Final hi May 22, Nilainiah Karantaka leh Delhi ten an khel ang.

Mizoram hian inpuahchahna an nei ṭha a, group stage-ah pawh an chungnung hle. An khingpui Meghalaya (5-0), Maharashtra (3-2) leh Rajasthan (7-0) te an hneh vek a, quarterfinal-ah Assam 5-1 in an sawp leh bawk.

Mahse, Rajasthan an hneh ṭumin defender Laldawngzuala a inhliam a, semifinal-ah Champhai rawlthar Dawnga awm loh a lang. Delhi-in hma takah an khung a, Mizoram captain Lalthankima'n minute 20-naah keeper bumin siphurh a sut.

Inkhelah erawh Delhi an chungnung a, inkhel an thununna hi goal-ah lantirin 3-1 in an hma an hruai. Mizoram goalkeeper Lalhruaitluanga che ṭha lo se, goal tam zawk an chhuah hial ang. Delhi an khel ṭha a, Mizoramin an ngam lo.

Mizoram tan Thathana bawk a rawn inlar a, minute 77-naah siphurh sut ṭhenin 3-2 a ni chiah. Mizoramin siphurh sut nan minute 10 ṭha an nei a, chance pawh an insiam. Sawma Tlangte leh Thathana ten hun ṭha an hlah ve ve.

Mizoramin siphurh an sut thei lo a, 3-2 in inkhel a tawp. Semifinal-ah Mizoram an khel ṭha tawk lo a, chak phu zawk Delhi an chak. Chutihrualin Mizoramin siphurh sut theihna hun ṭha an nei a, a bik takin Thathana leh Sawma Tlangte ten keeper chauh an hmachhawn hnua an khung loh chu an ui zual ang.