United-in chakin season an khar

Premier League-a an season chhe ber hmangtu Manchester United chuan hnehna nen season an khar a, khualmualah Brighton & Hove Albion chu 2-0 in an hneh - Diogo Dalot leh Rasmus Hojlund te chuan goal khat ve ve an khung.

United-in hnehna chang mah se lawmna tur erawh an nei tam lo. 1989-90 season hnua English top flight league-a season an khar chhiat ber a ni a, table-ah pariatna an ni - an chung lamah 'Big Six' chu an awm vek!

Red Devils hian goal khung tur erawhin an nghah rei a ngai hle. Minute 73-naah Dalot chuan goal hmahruai a khung ve chauh a, Rasmus Hojlund chuan minute 88-naah a belhchhah bawk.

United-in hnehna chang mah se, FA Cup final-a Manchester City hneh tur chuan tih tur tam tak an la nei tih a lang a, Brighton & Hove Albion khelmualah mualneitu team khel a mawi zawk.

Brighton tan Joao Pedro chuan chance duhawm nei mah se, centre back-a chhawr Casemiro chuan goal line aṭangin a lo pet chhuak hman a, Real Madrid defensive midfielder hlui hian Dalot-a khung tur a siamsak bawk.

Pedro bakah Adam Webster chuan Brighton tan chance duhawm a nei bawk a, mahse, goal-ah a chantir thei lo. Season thara Brighton chhuahsan tur coach Roberto de Zerbi-a'n Brighton a enkawl hnuhnung berah a club a chakpui zo lo a, Adam Lallana chuan Brighton tana a match hnuhnung ber a khel bawk.

United-in league kaltlang chuan season tharah European football an khel dawn lo chiang a, FA Cup an champion erawh chuan Europa League an khel thei ang.