Cricket hmasawnna tur lungphum phum

Board of Control for Cricket in India (BCCI) president Roger Binny chuan, online kaltlangin Mizorama cricket hmasawnna tur 'indoor cricket facility' leh 'pavillion' tur a hawng a, heng hmunhma hi cheng vaibelchhe 50 senga siam tur a ni.

May 19, Pathianni khan Roger Binny hian lungphum hi a phum a, Cricket Association of Mizoram (CAM) tan chuan hun chhinchhiah tlak tak niin, heng hmunhma pahnihte hi Sihhmuiah siam tur a ni ang.

Lungphum phum rual hian North East Cricket Development Committee member dang - Nagaland, Manipur, Meghalaya, Sikkim leh Arunachal Pradesh-ah te pawh 'indoor cricket facility' lungphum hi phum tel nghal a ni. NECDC-ah hian Mizoram telin North East State Association paruk an awm a ni.

Indoor cricket facility hian indoor practice pitch, swimming pool, lockers leh gymnasium te a keng tel ang. Hemi atan sum hman tur hi cheng vaibelchhe 18 niin, ruahman ang hian kumin October 30-ah hna hi thawh zawh tur a ni ang.

CAM ta tûr cricket pavillion-ah hian - khum 37 awmna hostel a awm dawn a, hostel-ah hian gymnasium a awm dawn. Chaw eina hmun dining hall bakah media lounge, reception, players dressing room, lounge etc. awm thei tûr a ni a, cheng vaibelchhe 32 man a ni thung.