Silly Point : Hapta Hnuhnung

TATA Indian Premier League 2024 an ṭan aṭangin hhla hnih a pumhlum chiah a, league round an zo. Zanin aṭangin a sang ber team pali-ten playoff an khel ṭan lehnghal dawn.

Rinlawk deuh team lut an awm rualin, league stage chawhnu lam thleng pawha thleng sang tura ngaih loh rawn lut nulh an awm bawk. A va hmuhnawm leh dawn si em!

Gujarat lamah mit i len ang

Tun dinhmuna India Cricket khelmual chhuan tawlawl, Ahmedabad khuaa mipui nuai khat leh sing hnih lenna Narendra Modi Stadium chu Playoff chin lo thleng turin a inpeih leh tawh.

League stage a kal vung tak, ṭum hnih IPL nomawi chawi tawh Shah Rukh Khan-a team Kolkata Knight Riders te hi an nomawi chawi hnuhnun ber aṭang khan kum 10-na chiah a ni.

KKR-in qualifiers 1-a an tumpui turte hi kumin T20 khelh dan thar rawn hmuchhuaktu, khawvel rawn barakhaihtu, Power Play-a mipuite ṭhu hman lek loa siamtu, kum 2016-a nomawi lo chawi tawh, Sunrisers Hyderabad te an ni.

Qualifiers 1:

Korbo, Lorbo, Jeetbo

Intum tur KKR leh Sunrisers te hian tactic inang deuh an nei a, chu chu an opening batter inkawp ve vete hi an chakna hnar an ni tlat. KKR-te league stage an khelh ṭhatna em em chu Philip Salt leh Sunil Narine te opening inkawp dal zo team an tam loh vang a ni deuh ber.

Narendra Modi Stadium-a nikum ICC World Cup final-a khawvel lo barakhaih tawhtu Australia leh Sunrisers Hyderabad kaptan Pat Cummings leh a hote hian hemi te pahnih inkawp hi an ṭhiah vat loh chuan a pawi thui ang.

Chutihrual chuan an team batting kaiza leh marphu ber chu Iyer te pahnih Shreyas Iyer leh Venkatesh Iyer te an ni tih theihngilh lo ila.

Kawl ti êngtu Sunrisers

Kumin IPL ah hian Team hmuhnawm ber award emaw, Cricket game rawn sawi danglam nasa ber award sem dawn ta ila, Sunrisers Hyderabad hi an ni ngei ang.

Powerplay over ruk chhunga 70/80 runs vel han siam hi chu a awm zeuh zeuh a. Mahse 100 runs chuang han hlap chhuah hi chu thil namai a ni lo a, chu pawh tihpalh leh khelh fuh ni ṭum khatah mai a ni lo a, ṭum thum zet mai mai he IPL-ah hian Travis Head leh Abhishek Sharma te inkawpin an rawn thawhchhuahpui tawh.

Head leh Abhishek te hi planet dang aṭangin an rawn kal ta maw tih mai tur an ni. Mit khap kar loah tumpuite inrin hmain, inkhel zawng zawng an thunun fai vek zel ṭhin hi Sunrisers ho kumin chakna hnar a ni.

An opening batter-te meialh kap chhuak ang maia khawsa ṭhin te hi, meialh bawka lo chhanglet turin Pat Cummings-a ṭhianpa Mitchell Starc te ho hian, eng tactic tak rawn hmang ang maw?

A chak zawk zawk chu hahdam takin Pathianni final atan kar tluan an lo inkhekkhal dawn si a .

I lo thlir zel ang.