Ropui takin Timberwolves an tho chhuak
A tawpah chuan beidawng duh loa bei hram hramte hian hlawhtlinna an chang leh nge nge ṭhin. Minnesota Timberwolves chuan point 20 ngawta an hnufual hnuah Denver Nuggets an hneh let a, ropui takin NBA Western Conference Finals an lut.
Nimin zinga game 7 an khelh hmain team pahnihte best of seven series-ah 3-3 in an inhnehtawk, a chak zawk chu tlang nghal tur an ni. A tir lama rinkai lo zawk Timberwolves hi 98-90 in an chak a, NBA playoff china inlehthalna nasa ber a ni hial.
Nikola Jokic leh Jamal Murray te awmna Nuggets hian chawlhlawk laiin point 15 ngawtin hma an hruai fal thei a, second half-a an san fal lai ber chuan point 20 zetin an chungnung hial a, nuamsa taka chak tur angin an lang hman.
Mahse, Timberwolves hian thi leh thau pawlhin an bei zui - Karl-Anthony Towns leh Jaden McDaniels te chuan point 23 ve ve an nei a; Anthony Edwards (16), Rudy Gobert (13), Naz Reid (11) leh Mike Colney Jr (10) ten an thlawp ṭha hle bawk.
Kum 20 hnua a vawi khat nan conference final-ah Timberwolves an inlan dawn, conference champion ni tur chuan Dallas Mavericks an hneh a ngai dawn - May 23, Ningani zing dar 6:00-ah game 1 an khel chhunzawm leh nghal ang.
Tun hnai hian NBA team an inel tawk thei hle a, season nga chhung chu NBA champion te hi a season dawt lehah conference finals lut phak loin an tla ta - Nuggets pawhin an hma lama champion hnuhnung pali te sulhnu ṭha lo hi an kalsan thei bik lo.
Nimin zing Eastern Confe-rence semifinals lamah Indiana Pacers chuan an khingpui New York Knicks lakah 130-109 in hnehna an chang ve bawk a, best of seven series chu 4-3 in an la ve bawk - harsa takin conference finals an lut.
Pacers hian conference finals-ah Boston Celtics an hmachhawn leh ang - best of seven series hmang thoin chak zawk hi zawn tur niin May 22, Nilaini zing dar 5:30-ah game 1 an khel dawn a ni.
NBA champion ni tur chun kawng zawh tur dang a la awm - conference champion pahnih te hian khawvela basketball inelna lian leh ngaihhlut bera champion nih hi an la inchuh chhunzawm leh dawn a ni.