Italian Open champion Alexander Zverev

Tennis inelna ngaihhlut zinga mi Italian Open mipa huangah Alexander Zverev a champion - German star hian Grand Slam dawta inelna ngaihhlut ATP masters 1000 title hi paruk a la tling ta chiah.

Pathianni zan Rome khawpuia final inkhel hmuhnawmah Zverev hian a khingpui Nicolas Jarry chu 6-4, 7-5 in a hneh; Italian Open bikah a champion vawi hnihna niin sulhnu a nei ṭha hle.

Player beiseiawm leh ṭha bik zinga mi Zverev hian French Open 2022 semifinal khan hliam na tak a tuar a, a hnu lamah tennis khel ṭha leh tawh mah se tun ṭuma mi hi a nomawi chawi hlu leh lian ber a ni hial.

Tun kara ranking chhuak thara number 4 ni tur Zverev chuan, "Rome khawpuiah hian tun hma khan a vawi khat nan Masters title ka la, hliam na tak ka neih hnua ka hlawhtlina lehna hmasa ber a ni bawk - ka tan chuan a hlu takzet," a ti.

Final match bik hi darkar khat leh minute 41 chhung khelh a ni, set hloh loin Zverev a tlang thei a, inkhel awlsam leh nuamsa taka chak erawh a ni chuang bik lo - hun pawimawh laia a chefuh zawk a ni ṭhin chu a vanneih phah.

World number 24 Jarry-a hian tournament ṭha tak a hmang ve bawk - final kalkawngah hian seeded parukna Stefanos Tsitsipas pawh a hneh, mahse Zverev-a service na leh hlauhawm tak lakah a ding zo lo.

Kum 27 mi Zverev chuan, "Tun ang hun pawimawh leh boruak sanga Jarry khelh dan kha a ṭha ka ti hle, a hnenah pawh a khel ṭha takzet tih ka hrilh. Tun anga a khel chhunzawm thei a nih chuan a la hlawhtling ngei ang," a ti.

German tlangval Zverev pawh hian hmabak a la nei, a hmabak chu Grand Slam champion a ni dawn. Player ṭha tak ni mah se major title a la hlawh chhuak ngai lo, kuminah hian hun remchang a nei leh thei ang.

Clay court inelna zinga lian leh ngaihhlut ber French Open chu tun kar aṭangin qualifier khelh ṭan a ni dawn a, kar leh lamah inelna tak an hmachhawn ang - Paris khawpui hi Zverev chuan beiseina sang tak nen a pan ang.

Kumin French Open-ah hian Rafael Nadal bakah Novak Djokovic a inlan dawn a, major title la thiam Carlos Alcaraz a awm dawn bawk. Mipa champion nih a awlsam dawn lo a, inelna hmuhnawm tak an chawp chhuak ngei dawn a ni.