A hmun ngaiah Verstappen a awm leh ta

Formula 1 an tlan chuan champion lai Max Verstappen hi chak tura rinna a lian em em ṭhin, intlansiak hnuhnung pakhatah amah ai thleng hma awm ve zauh mah se tunah chuan a hmasa berah a thleng leh ta.

Pathiannia tlan zawh tak Emilia Romagna Grand Prix-ah Verstappen a chak ber a, a hnungah hian tun hnaia hmuhnawm thei tak Lando Norris a thleng a, pathumna chu Charles Leclerc a ni thung.

Red Bull driver Verstappen hian a hmasa ber (pole) aṭangin intlansiak bul a ṭan a, a tir aṭanga a tawp thlengin inthlahdah thei erawh a ni bik lo. McLaren driver Norris-a'n a hnah chilh reng, a tawpa an inthlauhna chu second khat pawh a tling lo!

Tun season intlansiak pasarih awm tawh aṭanga vawi nga chak thei Max-a chuan, "A hautak hle mai, a bik takin lap hnuhnung 10 kha chu a harsa takzet a ni. Lando khan min hnaih thei em em a, second khat lek pawh tihsual a hlauhawm.

"Car ke (tyre) kan hman kha a ṭhenlaiah khan duhthusam ang thlap a ni lo deuh, chuvangin tihsual neih kha a hlauhawm. Intlansiak pumpuiah khan ka theihna sang ber ka hlan tluan parh a ni," tiin a hautak thu a sawi.

Tun hnaiah Lando Norris a rawn hmuhnawm zual. McLaren driver hian Miami Grand Prix-ah hnehna a chang a, tun ṭumah pawh driver ṭha bik Max nen an inum tawk hle, inelna ti hmuhnawm zualtu an ni chho ngei dawn.

Britain tlangval Norris chuan, "A bul ṭannaah tak khan Max a che ṭha lutuk a, a hnuah theihtawp chhuah leh mah ila a harsa tawh. Lap khat dang tlan belh tur la awm ni se la chuan kawng a inhawng mahna," a ti.

Tun season intlansiak vawi sarih an neih tawh aṭangin Verstappen chuan point 161 hmuin championship hmahruaitu a ni a, amah hnaih bertu Charles Leclerc chuan point 113 a hmu thung. Max-a hi a chesual hle a nih ngawt loh chuan a nomawi kawl lai chhuhsak a harsa dawn.

Car intlansiakna sang leh ngaihhlut ber hi May 26, Pathianni zanah an tlan chhunzawm leh dawn. Circuit de Monaco-ah Monaco Grand Prix an tlan leh dawn a ni.