Liverpool hnar phal lotu Slot

Jurgen Klopp-a ho an match hnuhnung ber an khelh aṭanga ni khatnaah Liverpool chuan coach thar an lakluh thu an puang a, a hming chu Arne Slot a ni - Dutch manager hian a tan Liverpool sawmna hnar a har thu a sawi chhuak zui.

Liverpool hian April khan Slot-a club enkawl lai Feyenoord chu an manager lak duh hian an lo dawr tawh a, Dutch coach lakchhuah nana pound maktaduai 9.4 pe turin inremna an lo nei tawh.

Klopp a chhuak a, Reds chuan Slot an lakluh thu an puang nghal. Feyenoord coach hlui hian kum thum chhung atan contract a ziak ang a, June 1 aṭangin a contract hi chhiar ṭan tur a ni ang.

Hnar harsa

Kum 45 mi Slot chuan, "Hun hlimawm leh danglam bik tam tak ka tawnna hmun, mi ṭha tak takte nen hlawhtling taka hna ka lo thawh tawhna hmun chhuahsan chu thil harsa tak a ni.

"Mahse, infiamna khawvela awm ka nih angin, Premier League-a coach nih a, khawvela club lian ber pawl enkawlna chance ka neih hi hnar a har em a ni," a ti a, Liverpool sawmna chu a tan hnar harsa a nih thu a sawi.

Hei aia la harsa mah tur erawh Klopp-a hmun ruak hnawhkhah a ni! German coach hi Liverpool fan-ten an âtchilh rawn a, kum kua chhungin nomawi pariat a chawi hman a, Champions League final-ah vawi thum ngawt Liverpool a hruai thleng thei.

Hriatthiamna

Slot hi Feyenoord-ah a hlawhtling hle. July 2021 khan Dutch team hi a enkawl ṭan a, a season hmasa berah Europa Conference League final a hruai thleng nghal - a season hnihnaah Dutch league a champion pui a, tun season-ah Dutch Cup-ah an champion bawk.

Feyenoord general manager Dennis te Kloese chuan, "Feyenoord chuan kan club tana mi hlu, coach ṭha Arne-a thlah hi kan ui takzet. Chutihrual chuan Liverpool ang club langsara luhna chance a awm chuan hnar phal chi a ni lo tih kan hrethiam.

"Chu chu kan rilrua dah reng chungin, a chinfel dan kan ngaihtuah a, a tawpah chuan ṭha takin kan inrem thei ta a ni," a ti a, an coach chu ui viau mah se a kal zelna tur atan ui beh reng chiah an ngaih loh thu a sawi.

Manager zinkawng

Player a nih laia a hun chu Slot hian Netherlands-ah a hmang zo a, FC Zwolle, NAC Breda leh Sparta Rotterdam te tan a khel a, midfielder a ni. A club hlui PEC Zwolle youth team enkawlin a coaching career a ṭan.

Kum 2016 khan SC Cambuur chu assistant manager ni turin a pan a, coach pangngaiah an chhawr chhunzawm. Mahse, kum 2017 khan AZ Alkmaar zawmin, assistant coach bawk a ni a, kum hnih hnuah manager puitling atan hlan kai a ni.

AZ-a manager a nihna anga a season hmasa berah Covid-19 vangin league tihtawp a ṭul a, titawp lo se a champion mai thei. Khatihlai khan table-ah pahnihna an ni a, hmahruaitu Ajax nen an point hmuh zat a inang. Mahse, December 2020 khan Feyenoord nen inbiakna an lo neih avangin ban a ni.

Duhthlanna

Liverpool hi a tir takah chuan an club player hlui Xabi Alonso nen sawizawm an ni a, mahse, ropui taka Bayer Leverkusen kaihruaitu Alonso hian German club-a cham a thlan avangin Reds hian an dawr zui lo.

Hetihlai hian Brighton & Hove Albion boss Roberto De Zerbi nen pawh sawizawm an ni a, Sporting Lisbon coach Ruben Amorim hming pawh sawi rik a ni a, khawthlang media ṭhenkhat chuan an inrem hman ang hialin an tarlang.

Mahse, Portuguese league-a Lisbon champion puitu coach man zata an inrem vek tawh hnuah, Sporting lamin a man an san leh nia sawi a ni a, Reds lam hi an lungawi loh avangin an dawr zui duh lo - tunah chuan Arne Slot nen an thawk dawn ta.

Manager aiah coach

Slot hi Liverpool chuan 'Manager' nihna pe loin, 'Head Coach' an ti a, hemi awmzia chu Slot hi khelmual lamah a insawrbing dawn tihna a ni ber - Klopp kha manager a ni a, player contract, player thar lakluh, club hmun leh hma chungchang thlengin a inrawlh vek.

Dutch coach erawh hetiang taka thuneihna hi pek a ni ve dawn lo a, khelmuala team enkawl leh kaihhruai lama a insawrbing theih nan 'Head Coach' tih a ni a, team thlan danah chuan thuneihna tawp a nei dawn tho.

Reds hian club technical director hlui Michael Edwards chu CEO of football turin an la kir a, Richard Hughes chu Sporting Director a ni dawn - anni pahnih hi Liverpool player lei leh hralh lama thuneihna tawp nei tur an niin a lang.