Tlai dar 1:00-ah MPL Under 17 final

MPL Under 17 final chu vawiin tlai dar 1:00 hian Chanmari FC leh Aizawl FC ten an khel dawn. Chanmari FC hi an club captain leh coach hlui Rochhingpuia'n a enkawl a, Aizawl FC hi senior team pawh enkawl tawhtu Victor Lalbiakmawia'n a kaihruai thung.

Chanmari hian league round-ah Aizawl FC hi 2-0 in an hneh a, final-ah pawh champion tura rinkai zawk an ni. Chutihrualin Victor leh amah puitu Benjamin Zothanmawia te enkawl Aizawl FC hi league round tawp lamah an che ṭah a, final-ah an khelh ṭhat ber hun an tawng a nih chuan champion nomawi an chawi thei hial ang.

MPL kum bithliah inelna hi a hmasa pahnihah Under 17 tih a ni a, a hnu lamah Under 18 tih a ni. Chanmari hian Under 17 a nih lai hian Jerry Mawihmingthanga hoin an champion tawh a, hemi hnu lamah erawh record an nei ṭha lo - tun hi final an luh lehna hmasa ber a ni chauh.

Aizawl FC hian academy mumal takin an kalpui a, mak ang reng tak erawh vawi khat chauh final lutin vawi khat chauh an la champion. Tun hi Aizawl FC-in final an luh vawi hnihna a ni a, nomawi an chawi thei a nih chuan Chanmari FC nen an champion zat a inang chiah ang.