An champion teuh tho a lawm

Beiseina an nei a, ni e - hun a tawp dawn khan beiseina tlemte chu an la nei asin. Mahse, hamrik hnuhnung a rik meuh chuan Arsenal ṭantuten hnemtu an ngai a, thu leh hlain an inhnem kual, chung zingah chuan 'An champion teuh tho alawm' tih pawh hnemtu awrawl a ni.

'Next Season' tia sawisatu an tam a, social media lamah 'Fail zinga mark hmu sang ber' tihte chu ṭhiante fiamna leh nuihsawhna langsar a ni bawk. Tling ṭhelh apiang pawi tih a zual, tih ang deuh khan Arsenal ṭantute tan lu thak lo pui hiah nawn hiah nawn a ngai mai zawng a nih kha!

Beiseina a thar

Hmanah chuan Arsene Wenger hoin an champion ṭhin a, an ropui lai erawhin hunin a liampuina a rei ta! Premier League nomawi an chawi hnuhnung ber laia piang te khan tunah chuan College an kal chhuak leh dawn hnai tawh, ṭhangkat lian aiin a rei ta a ni.

Arsenal ṭantu tam tak chuan season tawp dawnah hian, engtin nge season tharah Champions League an khelh phak ang tih an chhut ṭhin. Mikel Arteta hnuaiah hma an sawn thar leh a, tunah chuan league match tawp ber thlengin an champion theih dan an chhut ta.

UCL ticket neih theih danin an rilru a luah buai tawh lo a, nomawi chawi theih dan an ngaihtuah tawh zawk - an lungawi lohna hi a sang tawh viau a ni. Season tharah pawh Manchester City el phak leh ber tura ngaih an ni.

Premier League Golden Glove dawng thei David Raya hmaah William Saliba leh Gabriel an awm - Ben White a rintlakin season hmasa lama an beisei san Jurrien Timber chu an chhawr theih tawh a rinawm, tlarhnung phui hi an chakna pawimawh an ni ṭhin.

EPL nomawi vawi ruk chawi tawh Rio Ferdinand chuan, "Arsenal buaina chu inrintawkna an nei lo leh beisei an nei sang lo ṭhin kha a ni. Mahse, he an ngaihdan leh rilru puthmang hi Arteta chuan a rawn tidanglam," tiin a sawi.

A la tawk lo

Premier League an khelh tawh china point an hmuh tam pahnihna an tawng a, mahse champion nan a tawk zo chuang si lo. EPL nomawi chawi tur chuan ṭha leh hriam zual zawka an kal a ngai tihna a ni a, coach Arteta pawhin hei hi a hai lo.

Arsenal manager Arteta chuan, "Thutlukna kan siam hrang hrang te, hmasawn ka ngaihna lai leh siamṭhat ngai laite uluk takin kan en let ang. A pawimawh berah chuan champion kan duh takzet a, nomawi chawi duhin kan tuihal a ni tih kan lantir ang.

"Ṭha zual zawka kan khelh a ngai tih a chiang a, a chhan chu kan elpui hi team ṭha tak tak an ni. Chung mite chunga kan awm chu a ngai," a ti. Season tluan laia an chet ṭhat leh hnufual lai pawha thlawp tlattu fans chungah lawmthu a sawi bawk.

Spanish manager hian squad thuam chak ngei a tum. Chiang taka sawi la ni lo mah se, khawthlang chanchinbu mite chuan Arsenal hian striker, midfielder leh defender chhawr nghal mai theih tur an dap niin an sawi a, an neihsa ṭhenkhat erawh an chhuak thung ang.

Kumin thlasik bazar lai khan Arsenal hi striker lei tura ngaih an ni. Mahse, an goal khung harsatna thai boin goal khung an awlsam ta viau a, chutihrualin inkhel harsa leh striker hman ngaihna bik match a awm ṭhin, champion tura an mamawh ni ngei pawhin a rinawm.

Inkawm ngeih

Khelmual chhunga che ṭha tur chuan a pawn lama inbuatsaih ṭhat a ngai ṭhin. A bik takin mahni khelh puite hriatchian a ngai a, midfielder inkawp te, defender inkawp leh forward inkawp rem tur deuh phei chu football chauh ni loin thil dangah pawh an inpawh em em a ngai ṭhin.

ESPN tarlan dan chuan, nikum Krismas lai khan Bukayo Saka leh a chhungte chu Arsenal training-na hmunah an kal a, hetah hian hna thawktu leh player ṭhenkhat pawh an lo awm, hun pawimawhah pawh an club an ngai a, inhmuhkhawm kha an thlahlel a ni.

Nikum December thla kha an chet chhiat lai a ni a, hmahruaitu an nihna chhuhsak an nih bakah an elpui dangte pawhin an tlan pel. Hun harsa an tawh lai khan senior player ṭhenkhat chu coach Arteta kiangah an awm reng a, an thawh chhuah theih dan tur an ngaihtuah ṭhin.

Rilru thar an neih theih nan Dubai lamah an zin a, an lo kir leh hnu chuan team thar leh danglam tak ang maiin an zia an chhuah a, nuamsa takin an chak chhunzawm ta ngar ngar mai a, chetsual zeuh chu nei leh mah se an rilru put hmang nasa takin a danglam phah.

Tun hnaiah Ben White leh Martin Odegaard ten contract an ziak thar a, a hma deuhin Saka, William Saliba leh Gabriel Martinelli ten an ziak tawh bawk, vanglai hmang chho mek player an neih ṭhatte chelh ngheh an tum hle, squad tichak turin hma an la zui bawk ang.

Arsenal tan season duhawm tia sawi theihna lai tam tak a awm, team nghet tak an din bakah sulhnu chhinchhiah tlak tam tak an hnutchhiah a ni. 

Hnehna:

Tun season liam taah khan Arsenal hian inelna hrang hrangah match 52 an khel a, heng zinga 35-ah hnehna an chang - an win percentage hi 67.3% a ni a, an club record thar a ni hial.

Premier League-ah point 89 an hmu a, English football inelna sang berah hian point hmu tam pahnihna an ni. Hneh loh nei loa an champion ṭum khan point 90 an hmu, kumina an phak lohna chu point khat chauh a ni.

EPL match 28 ngawtah hnehna an chang a, hei pawh hi EPL tia sawi a nih china an club record a ni bawk. Kum 2024 bikah khan a tir lam match riat an chak vek, kum bul an ṭan fuh ber ṭum a ni.

Goal khung:

West Ham United (6-0), Burnley (5-0) leh Sheffield United (6-0) te a zawnin khualmualah an hneh a, EL-ah khualmualah a zawna match thum chhung goal nga leh a chunglama chak thei hmasa ber an ni hial.

Penalty chhiar tel loin set-piece aṭangin goal 22 an khung a, hei hi EPL record thar niin, corner bik aṭanga goal 16 an khung chuan EPL record lo awmsa a nih rual chiah bawk.

Eddie Nketiah-a'n hattrick a siam chiah khan record thar a ni bawk. Arsenal player zingah Premier League hattrick siam thei 22-na a ni a, match khata goal thung khung thei player nei tam ber an ni.

Goal venhim:

Premier League match 38 aṭangin goal 29 chauh an chhuah a, goal chhuah tlem ber an ni - anmahni hnaih bertu aiin goal ngaiin an chhuah tlem. Arsenal hian kum 20 chhunga league goal an chhuah tlem ber ṭum an tawng.

Goal chhuah lohna inkhel 'clean sheet' pawh vawi 18 an nei a, anmahni hnaih bertu aiin vawi ngain an nei tam zawk bawk. Goal difference +62 an neih chu an club-in EPL goal difference an neih ṭhat ber a ni bawk.

Wolves muala 2-0 a hnehna an chan khan, khualmualah a zawnin match ruk chhung goal chhuah loin an kaltluang. An tluk loh chu Manchester United leh Chelsea (vawi 7) te chauh an ni hial.