Zanin dar 12:30-ah Europa League final : Atalanta-in Alonso kaihhruai Leverkusen an dal thei ang em?

Europa League final chu zanin dar 12:30 hian Aviva Stadium, Dublin-ah Bundesliga champion Bayer Leverkusen leh Italian club Atalanta ten an khel dawn. Xabi Alonso kaihhruai Leverkusen hian tun season-ah hneh loh an la tawng lo a, an thlen chin apiang hi record a ni zel.

German club hian season khat chhung tawp, hneh loh tawng loin treble champion an tum a, a dal theitu chu Atalanta an ni. Leverkusen hian Bundesliga nomawi an chawi tawh a, Europa League final zawh hian DFB Pokal final-ah Kaiserslautern nen May 25, Inrinni zan hian an inhmachhawn leh ang.

Atalanta faktu Pep

Serie A club Atalanta hi an history thlirletin chhuan tur an nei lo a ni thei a, dah hniam ngawt a rem lo. Manchester City a zawna Premier League nomawi chawipuitu Pep Guardiola pawhin Atalanta khel hi a fak asin.

Tun hnai deuh khan Pep hi, "Atalanta leh AS Roma inkhel i en em?" tih an zawt a, Spanish manager chuan, "A hmuhnawm ka ti takzet. Atalanta an khel ṭha a, eng team pawh hneh thei an ni," tiin a chhang.

May 13, Thawhṭanni khan Atalanta-in an mualah Roma 2-1 in an hneh a, amaherawhchu he inkhel zawhah hian Coppa Itala final-ah khel ṭha zawk ni chung siin Juventus 1-0 in an hneh lo. Serie A table-ah Atalanta hi panganaah an awm mek a, an khelh hmabak match thum an chak vek chuan pathumnaah an awm thei thung.

Atalanta hian theihna an nei tih a chiang a, mahse inkhel pawimawhah an huaisenna an lantir a ṭul. Tun ṭum hi European competition-a final an vawi khat khelhna tur a ni a, rinkai lo zawk an nih avangin pressure an nei tlem dawn. Hei tak hi Italian club vanneihna a ni thei ang.

Scamacca leh Koopmeiners

Atalanta striker Gianluca Scamacca aia final khel châk hi an awm kher lo ang. Coppa Italia final-ah hrem vangin a khel thei lo a, nikum khan inhliam vangin Europa Conference League final-ah West Ham tan a khel thei lo bawk.

Italian striker Scamacca hian Europa League hnuhnung match sarih aṭangin goal ruk a khung a, kumin March 3 hnuah inelna hrang hrangah goal 12 a khung. Alonso hote pawhin Samcacca theihna an hre dawn a, an ven uluk tur zinga mi a ni ngei ang.

Atalanta leh Leverkusen ten attacking game an khel ve ve dawn a, chutihrualin final a nih miau avangin tlarhnung a phui ṭha dawn. Hetiang hunah hian hla tak aṭanga goal-a ball pet thei leh freekick pet thiam an hlu ṭhin. Atalanta-in Teun Koopmeiners an kawl a, Dutch midfielder hian Serie A-ah goal 12 khungin a goal ṭhahnem tak hi box pawn aṭanga a khung a ni.

A hming chu Wirtz

Germany-a rawlthar ṭha ber sawi tur ni ta se, inhnialna a tam khawp ang. Season hmasa lamah chuan Jamal Musiala an ti mai ang a, tun season-ah erawh Musiala hian elpui a nei tawh a, a hming chu Florian Wirtz a ni.

Leverkusen hian danglamna siam thei player Alejandro Grimaldo, Granit Xhaka leh Patrik Schick te nei bawk mah se Wirtz hi a 'special' ber. Mahse, tun hnaiah Bundesliga player of the season atana thlan Wirtz hi malpui hliam vangin a buai a, ngai a awh lo a nih chuan German club tan a pawi thui thei ang.

Football khawvela coach chhuak thar ṭha bera chhal ngam Xabi Alonso hian ngaihtuahna a seng hnem tih a lang a, player pawimawh a siksawi nasa ṭhin hle. Final-ah player a rem dik ang em tih hi zawhna a ni a; Josip Stanisic, Amine Adli, Jeremie Frimpong, Nathan Tella, Jonas Hofmann, Victor Boniface leh Patrik Schick te hian an khelh dan an bel vek a, awl erawh an awm a rinawm thung. Final a nih tawh avangin Alonso-a'n thutlukna a siam dik a pawimawh takzet.

Coach inang lo

Leverkusen coach Alonso hi player ang pawhin Liverpool, Bayern Munich leh Real Madrid-ah hlawhtlinna a lo chang tawh a, European C'ship-ah vawi hnih champion tawhin World Cup nomawi a chawi tawh.

Spanish manager Alonso hian senior team-a a enkawl hmasak ber chu Leverkusen hi a ni a, season khatnaah relegation zone aṭanga enkawl ṭanin parukna ni chungin season an khar. Season hnihnaah Alonso-a'n khawvel a barakhaih lehzual. Bundesliga an khel zo tawh a, Europa League leh DFB Pokal chauh khelh tur an nei tawh chungin hneh loh an la nei lo. Match 51-ah hneh loh an nei lo tihna a ni a, an record hi a ropui hle.

Gian Piero Gasperini erawh Juventus academy chhuak ni mah se player langsar a ni ve lo. Kum 2016 aṭangin Atalanta a enkawl ṭan a, an khelh dan nung ṭha tak avangin fak a hlawh hle. Amaherawhchu final-ah a vanduai ṭhin, Coppa Italia final-ah vawi thum ngawt a tlawm.

Tun hmain Gasperini hian Inter Milan pawh a lo enkawl tawh a, Supercoppa Italiana-ah a chak lo a, match nga hnuah an ban. Hei vang hian hming a chher tak takna chu Atalanta-ah a tih theih a, Serie A coach of the year-ah pawh vawi hnih thlan a ni. Mahse, Gasperini hian nomawi lian tham a la chawi lo a, Leverkusen hnehin nomawi chawi a tum ang. Atalanta hi Jurgen Klopp-a enkawl Liverpool hnehtu an ni a, German champion lakah an dawih bik lo ang.