Fan tan FA Cup champion a ngai - Onana

Manchester United goalkeeper Andre Onana chuan khawvel hmun hrang hranga United ṭantute thlawpna rulh let nan FA Cup nomawi chawi a ṭul thu a sawi. FA Cup final hi May 25, Inrinni zan dar 7:30 hian Wembley Stadium-ah khelh a ni dawn a, Man United hian an hmelma Manchester City an hmachhawn ang.

Premier League match hnuhnung berah Man United hian Brighton 2-0 in an hneh a, goal an chhuah lo. Onana chuan, "Kan thawkrim, hmasawn tumin theihtawp kan chhuah. Inkhel pawimawh tak khelh hmabak kan nei a, club tan, fan tan, ka tan leh ka teammate-te tan chak ngei a ṭul a ni," tiin a sawi.

Seagulls lakah hian Lisandro Martinez-a'n bul a ṭan a, bench aṭangin Raphael Varane a rawn lut bawk. Onana chuan, "Kan tan player pawimawh an ni a, khelmuala kan hmu leh thei hi kan lawm. Wembley-a hnehna chang turin player zawng zawng kan dam ṭhat hi a ngai. Chak tumin 100% kan pe dawn a, kan chet chhiat season-ah pawh min ṭawiawm tlattu fan-te hi nomawi hmanga kan rulh let a ngai a ni," tiin a sawi.

Manchester United hian FA Cup-a Man City an hneh thei a nih chuan season tharah Europa League an khel thei ang a, an chak lo a nih erawh chuan European competition-ah an inlan thei dawn lo thung.