Silly Point : Terminator
Silly Point kan chhiar meuh chuan nizan lama Qualifier 1 inkhel aṭangin tu nge Pathiannia khelh tur final-a ticket book fel tawh leh chance khat la nei a, Qualifier 2-a inlan tur team pakhat zawk kan hre tawh ngei ang.
Chumi Qualifier 2 a tel tur team pakhat zawk inchuhna, Eliminator 1 chu tun ṭumah hian kan thlir ho dawn. Zanin dar 7:30 hian Royals pahnih - Rajasthan Royals leh Royal Challengers Bengaluru te an inkhel dawn a ni.
Battery down Rajasthan
Group stage chawhma lamah 'hneh theih loh nun ka nei' tih hla kha anthem-a hmang ni awm taka khawsa Rajasthan Royals te hi, a rei telh telh a, an zuih chho telh telh emaw tih mai tur a ni a. League stage a an inkhel hnuhnung pangaah phei kha chuan chak ni reng an hmu lo a, 'chak lo tan chakna a lo ni' tih hla thu te kha an inhmeh zawk ta phian awm e.
An group stage bul ṭan that avang liau liauin playoff an lut kan ti thei ang a. Chak loh hri an vei laklawh (momentum) chhutchah hun tak chu zanin hi a ni ngei ang. A chhan chu tun IPL-a inkhel la awm hmabak pathumah (final tiamin) hian, a chak lo team apiang chuan bedding an tel zel tawh.
Rajasthan hian zanina an hmachhawn tur RCB hi, April 6 zan khan league stage lamah wicket rukin an lo hneh tawh a, hei hian phurna a pe turah ngai ila. Chutihrualin, zep thu a cheng lo a, tun season-a Rajasthan ho inghahna kaptan Sanju Samson leh Assam tlangval Ryan Parag a te khelh ṭhat zan a inher a ngai. Rajasthan Royals ho season chawhnu lama chet chhiatna chhan bulpui ber pawh he mite pahniha an innghat lutuk kha a ni ber.
Robot ni ta lo chu, khelh fuh lo ni a rawn inherin, a team angin dawl zawrin an zawr zel kha a ni ber mai awm e. Elimnator-ah Samson leh Parag te tan chet ṭhat a ṭul a, an che ṭha lo a nih chuan player dang an rawn pen chhuah ngei a ṭul tawh ang.
Mitthi tho leh khua Bengaluru
Group stage inkhel round 14 awm tura round 9 an khelh zawh hnu khan, he Royal Challengers Bengaluru hi table mawngphah an la ni a, kar hmasa tun ang hun thleng khan cricket khawvel za zela 90 vel chuan playoff an luh phak hi an ring lo hial ang.
Rajasthan Royals-in 'bul ṭan ṭhat hi chanve zo' tih an thupui a nih ngai chuan chu Royals rawn 'challenge' tur Royal Challengers ho chuan 'i nunhlui leh sulhnu a thlir ve lo, a hmawr bawk hi a pawimawh' tih hi an team thupui a ni ve ngei thung ang. Group stage chanve (inkhel 7) a ṭum khat chauh chak nei, Virat Kohli leh a naute hian, a dang match sarih la awmah vawi ruk hnehna an rawn chang leh lawi si.
Luhkapui ni loa, in hnung lam kawngkhar aṭanga a sap ṭawng takin 'back door entry' hmanga playoff rawn invawkai kan ti lo thei lo. An khelhṭhat kaltluang lai ti kaltluang zel tur chuan, kumina run vawchhuak khawl Virat Kohli bawkin zanin hian run vuakchhuah a inthlahrunloh a ngai ang, group stage tir lama an lu tihaitu, tun hnua lei rem rawn rap ta an bowling department lam innghahna Md Siraj leh Swapnil Singh a ten ṭan an khawh mar leh pat a ngai bawk.
Nipui 16 daih liam tawh,IPL hmasa ber an champion aṭanga champion nomawi la chawi leh lo Rajasthan nge champion nomawi hrim hrim hmel pawh la hmu lo RCB hi dingchang zawk ang?
Narendra Modi Stadium pitch hian eng ang tak maw? I lo thlir zel ang.
Qualifier 1 - Nizan Inkhel
(Result kan hre hman lo)
Kolkata Knight Riders 7:30 PM Sunrisers Hyderabad
Eliminator - Zanin Inkhel Tur
Rajasthan Royals 7:30 PM Royal Challengers Bengaluru
Qualifier 2 - May 24, Zirtawpni
Loser of QF1 7:30 PM Winner of Eliminator
Final - May 26, Pathianni
Winner of QF1 7:30 PM Winner of QF2