Euro 2024 zawh rualin Kroos a chawl dawn

Kum 34 chauh a la ni a, khawvela club langsar ber pawl Real Madrid tan regular takin a la khel a, Germany tan innghahna a la ni - mahse, Toni Kroos-a'n inkhelh reng a tum tawh lo a, Euro 2024 zawh ruala chawlh a tum thu a sawi.

World Cup 2014-a Germany champion team zinga mi Kroos hian July 2021 khan international football pawh a lo chawlhsan tawh a, mahse, February thla khan coach thar Julian Nagelsmann nen inbiakna neiin, Germany jersey ha turin a lo kir.

Hetiang a nih avang hian club football phei chu a chawlhsan mai tuman an ring lo. Mahse, German midfielder thiam bik hian chawl turin thutlukna a siam a, season tharah Kroos kan hmu tawh dawn lo.

A tawk ta e

Kroos chuan, "July 17th, 2014 kha Real Madrid player ka nihna anga phochhuah ka nihna a ni. Kha ni kha ka nun thlak danglamtu a ni a, footballer ka nihna mai piahlamah, mihring ka nihna anga ka nihpung thlak danglam a nihna ni a ni.

"Khawvela club lian bera ka hun bul inṭanna a ni a, mahse, kum 10 a liam meuh chuan ka hun a liam dawn ta. Hlawhtlinna kan chan ho tam takte kha ka theihnghilh tawh lo ang. Lawm taka min lo pawm a, ka chunga rinna nghattute chungah lawmthu ka sawi.

"A bik takin Madrid ṭantute chungah, a ni khatna aṭanga a tawp thlenga min hmangaihna avangin ka lawm lehzual a, chutihrual chuan Real tana ka khelh tawh dawn loh avangin tun nipui European Championship zawh rualin ka footballer career chu a tawp dawn ta," a ti a, a chawlh thu a puang.

Vanglai ngeiin...

Footballer tam zawkin rei tak khelmuala hun hman an duh a, an chuai tawh lamah pawh sum umin USA, Saudi leh middle east ram ṭhenkhatah inkhel turin an puanthuah an la tel hram ṭhin - Kroos erawh a chawl dawn.

German midfielder chuan, "Ka sawi fo angin Real Madrid hi ka club khelhna hnuhnung ber ni turin ka duh a ni. Keima duhthlanna ngeia chawlh ka puang thei hi ka lawm a, ka vanglai taka inkhelh chawlhsan hi ka tum sa dan a ni," a ti.

Real Madrid hian June 1, Inrinni zanah Borussia Dortmund nen Champions League final an khel dawn a, Kroos atan club level-a a match hnuhnung ber a ni ang. Real president Florentino Perez chuan, "Kroos hi Real chanchina player ropui ber pawl a ni a, he hmun hi a in a ni reng ang," a ti.

Sulhnu ropui

Bayern Munich aṭanga a professional zinkawng zawh ṭantu Kroos hian Bayern tan season ruk khelin, reserve tan division hniam lam a khel tawh bawk a, Bayer Leverkusen-ah season hnih loan-in a khel bawk - kum 2014 khan Real hi a pan.

Real a pan hma hian Bayern tan Bundesliga (3), DFB Pokal (3), DFL Supercup, Champions League, UEFA Super Cup leh FIFA Club World Cup-ah a champion a, 2012-13 season-a treble champion team zingah khan telin, Champions League final erawh a khel ve lo.

Kum 2014 khan Real zawmin La Liga (4), Copa del Rey (1), Supercopa de Espana (4), Champions League (4), UEFA Super Cup (3) leh FIFA Club World Cup (5) a chawi bawk a, sulhnu a hnutchhiah hraw hle.