Salah-a'n chhuah a tum lo

Liverpool forward Mohamed Salah chuan season tharah nomawi chawi tura theihtawp an chhuah tur thu social media-ah a tarlang a, hma hun chiang lo anga sawi forward hian Anfield-ah a cham a tum niin a lang.

Kum 31 mi Salah hian Reds-ah kum khat dang cham turin contract a la nei a, nipui lai khan Saudi Pro League club Al Ittihad chuan pound maktaduai 150-a lakluh tum mah se, Reds-in an hnar.

Hemi hnu lawk hian SPL director of football Michael Emenalo chuan Salah tan kawng a la inhawn reng thu a sawi a, nipui transfer-ah Saudi lam an lan leh rinna a lian hle - mahse, Salah thusawi aṭanga teh tur a nih chuan a chhuak dawn lo.

Saudi-ah hian Cristiano Ronaldo, Neymar, Karim Benzema leh Riyad Mahrez te chu player langsar khel mek an ni a, Liverpool-a Salah khelhpui ṭhin Saido Mane leh Roberto Firmino pawh an khel - Salah erawh a kal ve dawn lo niin a lang.

Salah chuan, "Nomawi a pawimawh ber tih kan hria a, fan-te beisei ang ngeia nomawi kan chawi theih nan season tharah tih theih apiang chu kan ti dawn. Kan fan-ten inphu a, theihtawp kan chhuah ang," a ti a, Anfield chhuahsan a tum lo.

Liverpool player ropui zinga chhiar tel tur hiala hming chhertu Salah hian tun season-ah Reds tan match 44 khelin goal 25 a khung a, assist vawi 14 a nei. Liverpool tan season sarih a khelh chhungin goal 20 khung tlin loh a nei ngai lo - a record hi a ropui hle.

Mahse, tun season-ah Reds hi League Cup-ah chiah an champion a, Salah-a'n nomawi tam zawk chawi a duh. Liverpool tan match 349 a khelha goal 211 leh assist vawi 89 neitu Salah hian a pu Jurgen Klopp thlahna thu a tarlang bawk.

Salah chuan, "Kum sarih liam ta chhunga hlawhtlinna kan chan dun leh, tawnhriat tam tak kan tawnhote kha ka ngaihlu hle. I hma hun atan duhsakna ka hlan che a, kan intawn leh thuai ka beisei," a ti a, Liverpool-a amah la luttu coach a thlah.