Messi aia insiam rem awlsam zawk Ronaldo - Alex Ferguson

Sir Alex Ferguson chuan Lionel Messi aia Cristiano Ronaldo ṭhatna chu insiam rem a awlsam zawkna hi a ni a ti a, Real Madrid forward hi khawi club-ah pawh khel se ṭha taka a khelh theih vek a rinthu a sawi.

Thawhlehni zan khan lemchang thiam James Nesbitt chuan golfer lar Rory McIlroy a kawm a, mipui 2,000 lenna Dublin Convention Centre-ah McIlroy vangin an khah zawh an beisei loh vang nge Sir Alex Ferguson chu khual pawimawh atana sawm tel a ni.

United manager hlui Fer-guson chuan, "Tunlaia player pahnih chungchang an khaikhin nasa lutuk hian ka beng a verh a, Ronaldo leh Messi hi sawi tham an ni ve reng bawk. Ka ngaihdan hi min lak kawih sak lo ula, Messi hi player ropui tak niin a ball khawih hi slipper nena awlsam taka ball chaih ang mai a ni. Amaherawhchu ka ngaihdan chuan Messi hi chu Barcelona player a ni a, Ronaldo erawh Stockport County tan pawh khel se hattrick a siam tho ang," tiin Ronaldo a fak thiam hle.

Stockport County hi Man-ches-ter khaw club a ni a, English football league system-a chhawng rukna club niin semi-professional club an ni.

Real Madrid forward Ronaldo fak chhunzawmin Ferguson chuan, "Ronaldo hian engkim a nei a ni. A ke pahnihin duh tawkin a pet thei a, a lu a hmang thiam em em a, sakeibaknei ang maiin a huaisen. Mipui hian Ronaldo chungchangah hian en kan an nei fo a, a thawhrimna hi tun dinhmun a thlen chhan a ni," tiin a sawi.

Manchester United-a a hunlai sawi langin Sir Alex chuan, "Manchester United ka enkawl lai khan player thawkrim tak tak ka tawn avangin ka vannei hle a ni. Gary Neville kha player naran tak ni mah se a thawhrim em avangin player ṭha takah a chhuak a, David Beckham a chanchin a danglam lo. Thawhrim kawngah Ronaldo a la chungnung leh a, ani chu chau hnap pawhin thawk se khawvela ṭha ber nih a duh avangin a chawl ngai lo," tiin Ronaldo chu a thawhrim vanga tun dinhmun thleng a nih thu a sawi.

Sir Alex Ferguson hian Manchester United player-te thawhrim chhana hmahruaitu chu Eric Cantona

a nih thu sawi langin, "Eric-a'n training hmasa ber a zawm ṭum kha ka la theihngilh lo. Training zawh hnuah junior team-a keeper pahnih bakah football min dil a, a chhan ka zawh chuan - Practice nan a duh thu min hrilh. Eric-a chungchang midangin an hriat hian an intih hmuh zel a, practice session baka mimala training nei an pung zel bawk. Cantona thawhrimna vang liau liau a ni," tiin United captain hlui a fak.

French forward Cantona hian first division (top flight)-a Leeds United a champion pui hnuin Man-chester United a zawm a, Premier League hmasa berah a champion pui nghal. Kum 1992-1997 chhung khan Cantona hi Manchester United tan khelin Premier League-ah vawi li a champion pui bakah FA Cup title pahnih a lakpui bawk. Ferguson pawhin Cantona thawhrimna hi a lo sawi fo tawh a, training-naa a kal hmasak ber ṭhin thu leh a haw tlai ber ṭhin thu a lo sawi tawh ṭhin.