England Squad bihchianna Eng vangin nge Theo Walcott an en kan?

Kum 10 liam ta khan Sven-Goran Eriksson chuan 2006 World Cup squad-ah Theo Walcott a ko a, tun hun hi a ṭhat lai ber tura ngaih ni mah se Arsenal forward hi Euro 2016 khel thei tur zingah telh a ni lo.

Walcott???

Swedish coach Eriksson khan Premier League pawh la khel lo Walcott chu Darren Bent, Andrew Johnson leh Jermain Defoe te aiah a ko a. Wayne Rooney leh Michael Owen te chu damkawr an ni a, Walcott leh Peter Crouch te chiah chu damchiang ni mah se England boss hian Arsenal striker hi a chhawr ngam lo.

Eriksson chuan, "World Cup lehah ka thil tih hlutna chu inhmu ang a, chumi hunah chuan lawm avangin pangpar min rawn la thawn ang," tiin a insawifiah. Amaherawhchu Fabio Capello-a'n kum li hnuah a ko lo a, 2014 World Cup-ah inhliam vangin Roy Hodgson-a koh theih turah a awm lo.

Theo Walcott hi kum 27-a upa a ni a, tun season-ah Premier League-ah match 28 khelin goal 5 a khung. FA Cup leh Champions League-a a khung zawng zawng nen chuan tun season-ah match 41 khelin goal 9 a khung a, Gunners-ah rinrawl a nih tlat loh avangin Hodgson a rilru a hmin zo lo niin a lang.

2016 Euro Qualifier-ah Walcott hian match li a khel a, minute ang zawng chuan minute 134 lek a ni. England manager Roy Hodgson-a'n Gunners forward Walcott a en kan chhan hi a chet ṭhat tawk loh vang a ni.

100% record nen

England hi 2016 Euro Qualifier-ah Switzerland, Slovenia, Estonia, Lithuania leh San Marino te nen Group E-ah an awm ho a, vawi hnih ṭheuh inkhelh kualah an chak vek.

Roy Hodgson-a hote hian match 10-ah point 30 an hmu a, goal 31 khungin goal thum chiah an chhuah a, an record hi a chhuanawm hle.

Keeper-ah Hart

Qualifier-ah goalkeeper Joe Hart-a'n match kua a veng a, match khat bikah erawh Jack Butland a inlan thung. Manchester City goalkeeper Hart hi Champions League semifinal thlengin tawnhriat a nei a, a rintlak avangin England no. 1 keeper a ni zel ang.

Stoke keeper Butland erawh inhliam vangin a tel thei lo. Hart-a thachhang dawltu tur Southampton keeper Fraser Forster hian league-ah minute 95.3 danah goal a chhuah a, Joe Hart (86.4) aiin a record a ṭha zawk.

Third keeper Tom Heaton hian tun season-ah Championship match zawng zawng Burnley tan khel kim vekin a champion pui a, clean sheet vawi 20 nei pha hial mah se ram tan erawh a la inlan lo.

Qualifier-ah England-in left back-ah Kieran Gibbs (4), Leighton Baines (3), Luke Shaw (2) leh Ryan Bertrand (1) te an chhawr a, inelna takah erawh khel tlem ber Saints left back Bertrand leh qualifier-a la inlan lo Danny Rose te koh an ni.

Gibbs-a'n Arsenal-ah Nacho Monreal a tluk lo a, United wing back Shaw-a'n season bul ṭan ṭha mah se ke ruh tliak vangin a season a tawp. Kum 31-a upa Leighton Baines hi 2015 khan ram tan vawi khat chiah a khel a, kuminah vawi khat mah la khel loin Hodgson-a hmathlirah a tel lo.

Chelsea youth system chhuak Bertrand emaw Spurs left back Rose te chu England innghahna an ni dawn a, Rose hi Tottenham Hotspurs tan league-ah vawi 18 chiah a inlan.

Cahill, Smalling, Stones

England-in John Terry an nei tawh lo a, tuna an innghahna chu Gary Cahill a ni. Qualifier-ah Cahill hi Everton captain Phil Jagielka nen an inkawp tam a, Euro 2016 khel turin Jagielka erawh koh a ni lo.

Everton defender John Stones leh United defender Chris Smal-ling te'n hmabak an nei êng a, koh zingah an tel. Kum 26-a upa Smalling hian clean sheets (17) leh interceptions (98) neiin hemi kawngah hian English defender zingah hmahruaitu a ni. Kum 21-a upa Stone erawh defence lam tana tehna pawimawh statistics-ah ti ṭha lo mah se pass tam (1,569) leh foul tlem (11) kawngah a che ṭha hle.

Right back-ah qualifier-a chhawr rim ber Nathaniel Clyne (6) koh a ni a, Liverpool wing back elpui tur chu Spurs right back Kyle Walker a ni.

Midfielders

Kum 24-a upa Jack Wilshere chu inhliam vangin hun tam zawk chawl mah se England squad-ah koh a ni a, talent a neih ṭhat vang liau liau a ni.

West Ham midfielder Mark Noble hi league-a an khelh dan aṭanga thlir chuan thlan zawk tur niin lang mah se Hammers pariatna nihpuitu kum 29-a upa Noble hi ram tan koh a ni lo. Hammers captain Noble hi league-ah vawi 34 a inlan a, goal 7 khungin passing accuracy pawh 86.2% tling phain England midfielder zingah Eric Dier chiah a tluk lo.

Arsenal central midfielder Wil-shere hi tun season-ah vawi thum chiah a inlan a, qualifier-ah erawh vawi nga lai inlan mah se chhuan theih a ni tawh lo. Wilshere a vannei a, Arsenal tan thawh hlawk lo mah se Hodgson-a'n a ring tlat.

England manager Roy Hodgson hian Liverpool a enkawl tawh a, Reds player leh hluite hi a chhawr rim a tih theih bawk. Hodgson-a hnuaiah Raheem Sterling, Adam Lallana, James Milner leh Jordan Henderson te'n hmun pawimawh an chang pha a, chutihrualin Reds player-ten ram tana khelh an phu bawk.

Liverpool vice captain James Milner-a'n assists vawi 11 lai neiin ṭhiante goal khung tur chance vawi 61 zet siam sakin English player-ah Leicester winger Marc Albrighton chiah a tluk lo. Amaherawhchu Foxes winger Albrighton erawh koh a ni lo.

Spurs-in season an hman ṭhat zarah an player pawimawh Dele Alli leh Eric Dier te chu hmaih chi an ni lo a, Leicester midfielder Dan-ny Drinkwater pawh a chet
ṭhat miau avangin United midfielder Michael Carrick aia koh a phu bawk.

England squad aṭangin player pathum an la paih dawn a; Ross Barkley, Fabian Delph leh Andros Townsend te hi vanduai zinga tel thei an ni. Arsenal forward Walcott aiah Andros Townsend an thlang phawt chu a ni a, English winger hian January thlaa Newcastle a zawm kha a tifuh hle.

Rashford a phu em?

Manchester United rawlthar Mar-cus Rashford hming lang nawlh hian sawi zui a hlawh a, kum 18-a upa forward hi phu titu an awm ang chiahin Jermain Defoe leh Troy Deeney aia an thlan chhan hrethiam lotu an tam hle.

Inelna hrang hrangah Rashford hian match 17-ah goal 8 a khung. Premier League bikah United forward hian match 11 a khelhah goal zawnah vawi riat a pet a, vawi khat chiah goal zawn loah a pet. Rashford hian league-ah goal nga a khung a, goal pawimawh a nih ṭhin avangin kum 10 liam taa Walcott-a an koh dan ngawt ai chuan a awm ang zawk.

Amaherawhchu kum 33-a upa Defoe-a'n Sunderland chhanhim turin league-ah goal 15 a khung a, English player-ah Harry Kane leh Jamie Vardy chiah a tluk lo. Watford striker Troy Deeney-a'n goal 13 a khung bawk a, goal khung aṭanga teh chuan Rashford aiin koh an phu zawk.

Rashford tan West Ham leh FA Cup final chu France zin theihna ṭha tak a ni dawn a, amaherawhchu Wayne Rooney, Harry Kane leh Jamie Vardy te chu hnawhchhuah theih loah an ngaih theih a. Europa League final khel tur Liverpool striker Daniel Sturridge leh Rashford hi bukin an awm dawn niin a lang. Reds striker hi inhliam vangin buai reng mah se league-ah match 13 khela goal riat a khung tho avangin Euro 2016 khel tur em chuan Rashford hi paih leh tur niin a lang. 

Player 26 awmna

England squad chu :

Goalkeepers : Joe Hart, Fraser Forster, Tom Heaton

Defenders : Ryan Bertrand, Gary Cahill, Nathaniel Clyne, Kyle Walker, Danny Rose, Chris Smalling, John Stones

Midfielders : Dele Alli, Ross Barkley, Fabian Delph, Eric Dier, Danny Drinkwater, Jordan Henderson, Adam Lallana, James Milner, Raheem Sterling, Andros Townsend, Jack Wilshere

Forwards : Harry Kane, Marcus Rash­ford, Wayne Rooney, Daniel Sturridge, Jamie Vardy.