Aston Villa-ah neitu thar

Premier League table mawngphah ni chunga season khar Aston Villa chuan nei-tu thar an nei dawn ta a, Recon Group houtpa Chinese sumdawng hausa Dr Tony Xia chuan Championship club hi pound maktaduai 60-in a lei.

Kum 2014-a club lo zuar tawhtu leh neitu Randy Lerner chuan, "Hun rei tak chhung chu thinlung zawng zawng nena he club enkawl tur leh vanneihna kan lo tawn tawhte min neihlet sak thei tur kan zawng a, Xia hi kan tawng ta a ni," tiin a lawm hle.

Villa hian manager thar pawh an puan thuai beisei a ni a, Villa enkawl tur hian Leicester chawikangtu Nigel Pearson leh Champions League-a Chelsea champion puitu coach Roberto di Matteo-te chu beisei an ni.

Tunge Xia?

Villa neitu thar Dr. Tony Xia hi Recon group neitupa niin he company hnuaiah hian Hong Kong leh China ramah te company panga lai a nei a, khawvel ram hrang hrang 75-ah office neiin mihring a chhawr zat ringawt pawh hi 35,000 an ni.

Xia hi football ngaina tak niin inkhel ṭhin a ni a, college a chhuahsan hnuah inkhelh hi chu a chawlhsan ve chauh. Hun rei tak chhung Villa
ṭantu a lo nih tawh thu sawitu sumdawng hausa hian club neitu nihna pum hlum (100%) a nei thei chu a lawm takzet thu a sawi.

Hmabak

Dr. Tony tan kawng a awlsam dawn lo. Staff hrang hrang rawih thar bakah squad remchhah belh chu a hna hmasa ber tur a ni dawn a, season khatnaah Premier League-a kir leh nghal an tum thu Tony chuan a sawi.

Hei mai a la ni lo cheu, Dr. Tony chuan Aston Villa chu mihring tamna leh a chawr chhuahna China-a club ngaihven leh lar ber nih tir tura hmalak a tum thu a sawi - China-a club a lar chuan sum a tam dawn tihna a ni.